पावसाळ्यात आरोग्याची काळजी घ्या; ‘या’ ५ भाज्या ठरतील फायदेशीर
Monsoon Vegetables To Eat : पावसाळा सुरू झाल्यानंतर वातावरणातील आर्द्रता वाढल्याने त्याचा परिणाम पचनशक्तीवर होऊ शकतो. या काळात अपचन, अॅसिडिटी, पोट फुगणे यांसारख्या समस्या वाढण्याची शक्यता असते. तसेच बाजारात उपलब्ध असलेल्या काही भाज्यांना ओलाव्यामुळे बुरशी किंवा कीड लागू शकते. त्यामुळे पावसाळ्यात भाज्यांची निवड आणि स्वच्छता याकडे विशेष लक्ष देणे आवश्यक आहे.
न्यूट्रिशनिस्ट श्वेता शाह यांनी सोशल मीडियावर केलेल्या पोस्टमध्ये पावसाळ्यात आहारात समावेश करता येणाऱ्या पाच भाज्यांची माहिती दिली आहे. भोपळा, दुधी भोपळा, दोडका, सुरण आणि पडवळ या भाज्या पावसाळ्यात आरोग्यासाठी उपयुक्त ठरू शकतात.
भोपळा : भोपळ्यामध्ये व्हिटॅमिन एचे प्रमाण चांगले असते. त्यामुळे रोगप्रतिकारक शक्तीला आधार मिळण्यास मदत होते. भोपळ्याची भाजी किंवा सूप आहारात घेता येते.
दुधी भोपळा : दुधी भोपळा पचनसंस्थेसाठी हलका मानला जातो. पचनक्रिया सुरळीत ठेवण्यास आणि आतड्यांचे आरोग्य चांगले राखण्यास तो मदत करू शकतो.
हेही वाचा – महाराष्ट्राच्या विकासासाठी केंद्राकडे पाठपुरावा; पंतप्रधान मोदींसोबत फडणवीसांची महत्त्वपूर्ण चर्चा
दोडका : दोडक्यामध्ये पाण्याचे प्रमाण चांगले असल्याने शरीराला हायड्रेट ठेवण्यास मदत होते. त्याची भाजी, सूप किंवा चटणी अशा विविध प्रकारे आहारात समावेश करता येतो.
सुरण : सुरणामध्ये फायबर तसेच विविध खनिजे असतात. फायबरमुळे आतड्यांची हालचाल आणि शौचाची प्रक्रिया सुरळीत राहण्यास मदत होऊ शकते.
पडवळ : पावसाळ्यात होणाऱ्या अॅसिडिटी आणि पोट फुगण्यासारख्या पचनाशी संबंधित त्रासांपासून बचाव करण्यासाठी पडवळाचा आहारात समावेश करता येतो.
हंगामी भाज्यांना द्या प्राधान्य
पावसाळ्यात बाजारातून भाज्या खरेदी करताना त्या ताज्या आहेत की नाही, त्यावर बुरशी किंवा कीड नाही ना, याची तपासणी करणे महत्त्वाचे आहे. भाज्या स्वच्छ धुऊन आणि योग्य प्रकारे शिजवून खाव्यात. ऋतूनुसार उपलब्ध होणाऱ्या ताज्या भाज्यांचा आहारात समावेश केल्याने शरीराला आवश्यक पोषक घटक मिळण्यास आणि पचनक्रिया सुरळीत ठेवण्यास मदत होऊ शकते
.टीप : ही माहिती सर्वसाधारण माहितीसाठी आहे. कोणताही वैद्यकीय सल्ला घेण्यापूर्वी आपल्या डॉक्टरांचा सल्ला घेणे आवश्यक आहे.
महाईन्यूज-X वर फॉलो करा : महाईन्यूजला instagram वर फॉलो करा
