धक्कादायक! मुंबईत नौदल जवानासह पत्नी आणि दोन मुलांचा संशयास्पद मृत्यू
मुंबई | स्वातंत्र्यदिनाच्या दिवशी दक्षिण मुंबईतील कुलाबा येथील उच्च सुरक्षा असलेल्या ‘नेव्ही नगर’ परिसरात एक अत्यंत धक्कादायक आणि हृदयद्रावक घटना समोर आली आहे. नौदलातील एका सैनिकाच्या शासकीय निवासस्थानी तो सैनिक, त्याची पत्नी आणि दोन लहान मुले अशा एकाच कुटुंबातील चौघांचे मृतदेह संशयास्पद स्थितीत आढळून आले आहेत. या घटनेमुळे नौदल वर्तुळात तसेच परिसरात मोठी खळबळ उडाली असून पोलिसांनी तातडीने सखोल तपासाला सुरुवात केली आहे.
प्राथमिक माहितीनुसार, नौदल सैनिकाने गळफास घेऊन स्वतःचे जीवन संपवल्याचा संशय आहे, तर त्याच्या पत्नीचा आणि दोन्ही मुलांचा मृत्यू विषबाधेमुळे झाल्याची शक्यता वर्तवण्यात येत आहे. पोलिसांनी घटनास्थळावरून वैज्ञानिक व फॉरेन्सिक पुरावे गोळा केले आहेत. चारही मृतदेह शवविच्छेदनासाठी (Post-Mortem) रुग्णालयात पाठवण्यात आले असून, शवविच्छेदन आणि रासायनिक विश्लेषणाचा (Forensic Report) अहवाल आल्यानंतरच मृत्यूचे नेमके कारण स्पष्ट होईल, असे वरिष्ठ पोलीस अधिकाऱ्यांनी स्पष्ट केले आहे.
हेही वाचा
मोरया शिक्षण संस्थेच्या सर्व शाळांमध्ये ८० वा स्वातंत्र्य दिन जल्लोषात
भारतीय नौदलाकडून तपासात पूर्ण सहकार्य
या दुर्दैवी घटनेची दखल घेत भारतीय नौदलाने अधिकृत निवेदन जारी केले आहे. १५ ऑगस्ट रोजी नेव्ही नगरमधील निवासस्थानी एका नौदल सैनिकाचे संपूर्ण कुटुंब मृतावस्थेत आढळल्याची पुष्टी नौदलाने केली असून, स्थानिक पोलिसांच्या सुरू असलेल्या तपासात नौदलाकडून सर्वतोपरी सहकार्य केले जात असल्याचे स्पष्ट करण्यात आले आहे. दरम्यान, हे सामूहिक आत्महत्येचे प्रकरण आहे की यामागे अन्य काही कारण आहे, हे स्पष्ट करण्यासाठी पोलीस शेजारी, नातेवाईक आणि सहकाऱ्यांचे जबाब नोंदवत आहेत.
महाईन्यूज-X वर फॉलो करा : महाईन्यूजला instagram वर फॉलो करा
