विमानतळावर पिस्तुलातून अचानक गोळी सुटली; दोन कर्मचारी जखमी

वाराणसी : उत्तर प्रदेशातील वाराणसी विमानतळावर शस्त्र तपासणीदरम्यान प्रवाशाच्या पिस्तुलातून अचानक गोळी सुटल्याची घटना रविवारी (१६ ऑगस्ट) सकाळी साडेनऊच्या सुमारास घडली. या घटनेत विमानतळावरील दोन कर्मचारी जखमी झाले. जखमींमध्ये एका महिला कर्मचाऱ्याच्या मांडीला, तर एका पुरुष कर्मचाऱ्याच्या हाताला गोळी लागली.

मिळालेल्या माहितीनुसार, आझमगड येथील संबंधित प्रवासी पत्नीसमवेत मुंबईला जाणाऱ्या एअर इंडियाच्या IX-1810 विमानाने प्रवास करणार होता. त्याच्याकडे पिस्तूल आणि मॅगझिन होते. विमानतळावर येण्यापूर्वी त्याने शस्त्राची आवश्यक घोषणा केली होती.

वाराणसी विमानतळाचे संचालक पुनीत गुप्ता यांनी दिलेल्या माहितीनुसार, प्रवाशाने घोषित केलेल्या पिस्तुलाची आणि संबंधित कागदपत्रांची तपासणी सुरू होती. याच प्रक्रियेदरम्यान पिस्तुलातून अचानक गोळी सुटली. गोळी प्रथम जमिनीवर आदळली आणि त्यानंतर जवळ उभ्या असलेल्या दोन कर्मचाऱ्यांना लागली. दोन्ही जखमी कर्मचारी AAICLAS तपासणी पथकाशी संबंधित असल्याचे सांगण्यात आले.

हेही वाचा –  ‘सिंहस्थ कुंभपर्व’ पुस्तिकेवर गिरीश महाजनांचा ‘पालकमंत्री’ म्हणून उल्लेख; नाशिकच्या राजकारणात पुन्हा चर्चांना उधाण

घटनेनंतर विमानतळ कर्मचाऱ्यांनी जखमींना तातडीने न्यू लक्ष्मी ट्रॉमा सेंटरमध्ये उपचारासाठी दाखल केले. त्यांच्या प्रकृतीबाबतची सविस्तर माहिती अद्याप समोर आलेली नाही.

घटनेची माहिती स्थानिक पोलिसांना देण्यात आली असून, पोलिसांनी तपास सुरू केला आहे. प्रवाशाकडील पिस्तूल, परवाना आणि संबंधित कागदपत्रांची पडताळणी केली जात आहे. तसेच गोळी नेमकी कशी सुटली आणि सुरक्षा तपासणीच्या प्रक्रियेत काही त्रुटी झाली का, याचाही तपास केला जात आहे.

दरम्यान, प्रवाशाने पिस्तुलाची विमानतळावर घोषणा केली होती. त्यामुळे प्राथमिक माहितीनुसार, शस्त्र लपवून विमानात नेण्याचा प्रयत्न झाल्याचे दिसून येत नाही. मात्र, घटनेमागील नेमके कारण तपास पूर्ण झाल्यानंतर स्पष्ट होणार आहे.

महाईन्यूज-X वर फॉलो करा : महाईन्यूजला instagram वर फॉलो करा