Breaking-newsताज्या घडामोडीपिंपरी / चिंचवड

संविधान दिनानिमित्त पिंपरी-चिंचवडमध्ये पहिल्यांदाच भव्य ‘संविधान सन्मान दौड’!

डॉ. सुहास कांबळे यांच्या पुढाकाराला यश

– स्थायी समितीची मंजुरी; सभापती अभिषेक बारणे यांची माहिती

पिंपरी-चिंचवड | प्रतिनिधी

भारतीय संविधानाचा सन्मान, लोकशाही मूल्यांचे संवर्धन आणि युवा पिढीमध्ये संविधानाविषयी जागरूकता निर्माण करण्याच्या उद्देशाने पिंपरी-चिंचवड शहरात पहिल्यांदाच आयोजित करण्यात येणाऱ्या भव्य ‘संविधान सन्मान दौड-२०२६’ला महापालिकेच्या स्थायी समितीने सर्वानुमते मंजुरी दिली आहे. या दौडीच्या आयोजनासाठी १५ लाख रुपयांच्या निधीला मंजुरी देण्यात आली असून, संविधान दिनानिमित्त आयोजित करण्यात येणाऱ्या विविध कार्यक्रमांसाठी एकूण ३९ लाख रुपयांची आर्थिक तरतूद मंजूर करण्यात आली आहे. स्थायी समिती सभापती अभिषेक बारणे यांनी पत्रकार परिषदेत ही माहिती दिली.

भारतीय संविधान दिनाचे औचित्य साधून शहरात पहिल्यांदाच भव्य ‘संविधान सन्मान दौड’ आयोजित करण्याची संकल्पना महापालिकेच्या शहर सुधारणा समितीचे सदस्य तथा नगरसेवक डॉ. सुहास लक्ष्मण कांबळे यांनी मांडली होती. आमदार महेश लांडगे यांच्या मार्गदर्शनाखाली त्यांनी या उपक्रमासाठी महापालिका प्रशासनाकडे पाठपुरावा केला होता. आयुक्त डॉ. विजय सूर्यवंशी, महापौर रवि लांडगे, स्थायी समिती सभापती अभिषेक बारणे आणि सत्तारूढ पक्षनेते प्रशांत शितोळे यांच्याकडे लेखी पत्राद्वारे या उपक्रमाचे आयोजन करण्याची मागणी करण्यात आली होती.

या मागणीची दखल घेत नुकत्याच झालेल्या स्थायी समितीच्या बैठकीत हा विषय मांडण्यात आला. स्थायी समिती सभापती अभिषेक बारणे यांच्या उपस्थितीत या प्रस्तावाला सर्वानुमते मंजुरी देण्यात आली. त्यामुळे संविधान सन्मान दौडीच्या आयोजनाचा मार्ग मोकळा झाला आहे. यापुढे दरवर्षी ही भव्य संविधान सन्मान दौड आयोजित केली जाईल, असा संकल्प यावेळी करण्यात आला.

हेही वाचा –  ‘विकसित भारत २०४७’साठी मोदींचा मंत्र्यांना कृतीचा संदेश; सरकारी योजनांचा लाभ शेवटच्या व्यक्तीपर्यंत पोहोचवण्याचे निर्देश

दहा किलोमीटरची भव्य दौड!

प्रस्तावित ‘संविधान सन्मान दौड-२०२६’ साधारण दहा किलोमीटर अंतराची असणार आहे. या उपक्रमात शहरातील शाळा, महाविद्यालये, विविध सामाजिक संस्था, युवक मंडळे, महिला बचत गट, क्रीडा संघटना आणि सर्वसामान्य नागरिकांचा मोठ्या प्रमाणावर सहभाग अपेक्षित आहे. हजारो नागरिकांना या दौडमध्ये सहभागी करून घेण्याचे नियोजन करण्यात येणार आहे.

ही दौड केवळ क्रीडा स्पर्धा न राहता भारतीय संविधानातील समता, स्वातंत्र्य, बंधुता, सामाजिक न्याय आणि राष्ट्रीय एकात्मतेची मूल्ये जनमानसात रुजवणारी लोकचळवळ ठरावी, हा या उपक्रमामागील मुख्य उद्देश आहे.

संविधान दिनानिमित्त विविध उपक्रमांचे आयोजन!

२६ नोव्हेंबर हा दिवस देशभरात भारतीय संविधान दिन म्हणून साजरा केला जातो. या पार्श्वभूमीवर पिंपरी-चिंचवड महापालिकेच्या माध्यमातून विविध जनजागृतीपर कार्यक्रमांचे आयोजन करण्यात येणार आहे. संविधानाचे महत्त्व, नागरिकांचे मूलभूत अधिकार आणि कर्तव्ये, लोकशाही व्यवस्था तसेच डॉ. बाबासाहेब आंबेडकर यांचे संविधान निर्मितीतील योगदान नव्या पिढीपर्यंत पोहोचविण्यावर भर देण्यात येणार आहे.

स्थायी समितीने दिलेल्या ३९ लाख रुपयांच्या मंजुरीमुळे या उपक्रमांना आर्थिक पाठबळ मिळाले असून, शहरात संविधान दिन व्यापक लोकसहभागातून साजरा करण्याच्या दृष्टीने महापालिकेने महत्त्वपूर्ण पाऊल उचलले आहे.

डॉ. सुहास कांबळे यांच्या संकल्पनेला यश!

संविधान सन्मान दौडीची संकल्पना मांडून तिच्या आयोजनासाठी सातत्याने पाठपुरावा करणारे नगरसेवक डॉ. सुहास कांबळे यांच्या पुढाकाराला स्थायी समितीच्या मंजुरीमुळे यश आले आहे. लोकशाही मूल्यांचा जागर, संविधानाप्रती आदर आणि सामाजिक समतेचा विचार नागरिकांपर्यंत पोहोचविण्यासाठी हा उपक्रम महत्त्वपूर्ण ठरणार आहे.

महाईन्यूज-X वर फॉलो करा : महाईन्यूजला instagram वर फॉलो करा

स्थायी समितीच्या मंजुरीनंतर पत्रकार परिषदेत माहिती देताना अभिषेक बारणे यांनी संविधान दिनानिमित्त शहरात व्यापक स्वरूपात कार्यक्रम आयोजित करण्यासाठी ३९ लाख रुपयांची तरतूद करण्यात आल्याचे सांगितले. त्यामध्ये संविधान सन्मान दौडीसाठी स्वतंत्रपणे १५ लाख रुपयांच्या निधीला मंजुरी देण्यात आली आहे. शहरातील नागरिक, विद्यार्थी आणि युवकांचा मोठ्या प्रमाणावर सहभाग घेऊन संविधान दिन उत्साहात आणि जनजागृतीच्या माध्यमातून साजरा करण्याचा महापालिकेचा प्रयत्न राहणार आहे.

– अभिषेक बारणे, सभापती, स्थायी समिती

‘‘भारतीय संविधान हे आपल्या लोकशाहीचे सर्वोच्च अधिष्ठान असून, डॉ. बाबासाहेब आंबेडकर यांनी दिलेल्या संविधानातील समता, स्वातंत्र्य, बंधुता आणि सामाजिक न्यायाची मूल्ये प्रत्येक नागरिकापर्यंत पोहोचली पाहिजेत. संविधान दिन हा केवळ औपचारिक कार्यक्रमापुरता मर्यादित न राहता जनजागृतीचा व्यापक उत्सव झाला पाहिजे. याच उद्देशाने पिंपरी-चिंचवड शहरात ‘संविधान सन्मान दौड’ आयोजित करण्यासाठी आम्ही पुढाकार घेतला आहे. या उपक्रमातून हजारो नागरिकांना एकत्र आणून संविधान सन्मानाची लोकचळवळ उभी करण्याचा आमचा संकल्प आहे.’’

– डॉ. सुहास लक्ष्मण कांबळे नगरसेवक, पिंपरी-चिंचवड महापालिका

Job AlertJob Alert Job Alert Job Alert Job Alert

Related Articles

Leave a Reply

Your email address will not be published. Required fields are marked *

Back to top button
Join WhatsApp Group