मॉस्कोवर युक्रेनचा भीषण ड्रोन हल्ला; ६ जणांचा मृत्यू, वाइल्डबेरीजच्या गोदामाला आग

मॉस्को : रशिया आणि युक्रेनमधील युद्ध पुन्हा एकदा तीव्र झाले असून, युक्रेनने रविवारी (१६ ऑगस्ट) रशियाची राजधानी मॉस्को आणि इतर भागांवर मोठ्या प्रमाणात ड्रोन हल्ले केल्याची माहिती समोर आली आहे. या हल्ल्यांमध्ये किमान सहा जणांचा मृत्यू झाल्याचे वृत्त आहे. हल्ल्यानंतर मॉस्को परिसरातील वाइल्डबेरीज या रशियातील मोठ्या ई-कॉमर्स कंपनीच्या गोदामाला भीषण आग लागली. आगीमुळे परिसरात काळ्या धुराचे मोठे लोट दिसून आले.

रशियाच्या संरक्षण मंत्रालयाने दिलेल्या माहितीनुसार, रात्रीच्या कारवाईदरम्यान युक्रेनचे तब्बल ८२२ ड्रोन हवेतच नष्ट करण्यात आले. मॉस्कोचे महापौर सर्गेई सोब्यानिन यांनीही शहराच्या दिशेने ६०० हून अधिक ड्रोन येत असल्याचे सांगितले. त्यापैकी अनेक ड्रोन रशियन हवाई संरक्षण यंत्रणेने पाडल्याचा दावा करण्यात आला आहे.

मॉस्कोसह युक्रेनने रशियाच्या नैऋत्येकडील रोस्तोव्ह प्रदेशातील तीन शहरांनाही लक्ष्य केल्याचे सांगण्यात येत आहे. रोस्तोव्हचे गव्हर्नर युरी स्लुसार यांच्या माहितीनुसार, १५० हून अधिक ड्रोनच्या हल्ल्यात पाच जणांचा मृत्यू झाला. अनेक घरांचे तसेच एका रेल्वे स्थानकाचे नुकसान झाले असून, एका जंगलालाही आग लागल्याचे त्यांनी सांगितले.

हेही वाचा –  पुणेरी यलमार स्नेहमेळावा उत्साहात; ‘झेप’ पुस्तकाचे प्रकाशन

मॉस्कोवरील ड्रोन हल्ल्यानंतर वाइल्डबेरीजच्या कोलेडिनो वितरण केंद्राला आग लागली. हे मॉस्को परिसरातील कंपनीच्या प्रमुख वितरण केंद्रांपैकी एक असल्याचे सांगितले जाते. आगीचे दृश्य सोशल मीडियावर मोठ्या प्रमाणात प्रसारित झाले आहे.

जुलैपासून वाइल्डबेरीजच्या किमान २० गोदामांना लक्ष्य करण्यात आल्याचा दावा करण्यात येत आहे. मात्र, या हल्ल्यांमागील नेमके कारण आणि संबंधित वितरण केंद्राला लागलेली आग ड्रोन हल्ल्यामुळेच लागली का, याबाबत अधिकृत तपशील अद्याप स्पष्ट झालेला नाही.

रशिया आणि युक्रेनकडून सातत्याने एकमेकांच्या शहरांवर ड्रोन आणि क्षेपणास्त्र हल्ले सुरू आहेत. ताज्या हल्ल्यामुळे दोन्ही देशांमधील संघर्ष आणखी तीव्र होण्याची शक्यता व्यक्त केली जात आहे.

महाईन्यूज-X वर फॉलो करा : महाईन्यूजला instagram वर फॉलो करा