PCMC: मोशी दुर्घटनेतील मृतांच्या कुटुंबीयांना कंपनीकडून ४० लाखांची मदत

पिंपरी- चिंचवड :  मोशी कचरा डेपो परिसरातील भीषण दुर्घटनेत मृत्यू झालेल्या कर्मचाऱ्यांच्या कुटुंबीयांना संबंधित कंपनीकडून मोठा दिलासा देण्यात आला आहे. प्रत्येक मृत कर्मचाऱ्याच्या कुटुंबीयांना ४० लाख रुपयांची आर्थिक मदत देण्याची घोषणा कंपनीच्या वतीने करण्यात आली. यासोबतच मृत कर्मचाऱ्यांच्या पाल्यांच्या शिक्षणाची जबाबदारी, कुटुंबातील पात्र व्यक्तीला नोकरी आणि आरोग्य विम्याचे संरक्षण देण्याचा निर्णयही जाहीर करण्यात आला.

या महत्त्वपूर्ण निर्णयाची माहिती देण्यासाठी सोमवारी पत्रकार परिषदेचे आयोजन करण्यात आले होते. यावेळी सत्तारूढ पक्षनेते प्रशांत शितोळे, स्थायी समिती सभापती अभिषेक बारणे, ‘क’ क्षेत्रीय कार्यालयाचे प्रभाग अध्यक्ष निखिल बोऱ्हाडे,  विधी समिती सभापती सुजाता बोराटे, नगरसेविका सारिका गायकवाड, कंपनीचे एचआर प्रतिनिधी तसेच दुर्घटनेत मृत्यू झालेल्या कर्मचाऱ्यांचे नातेवाईक उपस्थित होते.

८ जुलैच्या दुर्घटनेने हादरले शहर

मोशी येथील कचरा डेपो परिसरात ८ जुलै रोजी कचऱ्याचा मोठा ढिगारा वेस्ट-टू-एनर्जी प्रकल्पाच्या प्रशासकीय इमारतीवर कोसळला. या दुर्घटनेत एकूण ९ कर्मचाऱ्यांचा मृत्यू, तर १४ जण जखमी झाले होते. ढिगाऱ्याखाली अडकलेल्या कामगारांचा शोध घेण्यासाठी विविध बचाव पथकांनी युद्धपातळीवर मोहीम राबवली. तब्बल ८४ तासांच्या अथक प्रयत्नांनंतर बचावकार्य पूर्ण करण्यात आले.

या दुर्घटनेनंतर मृत कर्मचाऱ्यांच्या कुटुंबीयांना तातडीने आर्थिक मदत मिळावी, तसेच त्यांच्या भविष्यासाठी ठोस उपाययोजना कराव्यात, अशी मागणी विविध स्तरांतून करण्यात आली होती.

महापालिकेकडूनही प्रत्येकी १० लाख

दुर्घटनेची तीव्रता लक्षात घेता पिंपरी-चिंचवड महापालिकेने मृत कर्मचाऱ्यांच्या वारसांना प्रत्येकी १० लाख रुपयांची आर्थिक मदत देण्याचा निर्णय घेतला आहे. त्यानंतर आता संबंधित कंपनीने प्रत्येकी ४० लाख रुपयांच्या मदतीची घोषणा केल्याने मृतांच्या कुटुंबीयांना आर्थिक आधार मिळणार आहे.

केवळ आर्थिक मदत नाही; भवितव्याचीही जबाबदारी

कंपनीच्या निर्णयाचे वैशिष्ट्य म्हणजे केवळ आर्थिक मदतीपुरते हे पॅकेज मर्यादित ठेवण्यात आलेले नाही. मृत कर्मचाऱ्यांच्या पाल्यांच्या शिक्षणाचा खर्च, कुटुंबातील पात्र व्यक्तीला रोजगार आणि आरोग्य विमा उपलब्ध करून देण्याची घोषणा करण्यात आली आहे. त्यामुळे कुटुंबातील कमावती व्यक्ती गमावल्याने निर्माण झालेल्या आर्थिक संकटासोबतच मुलांच्या शिक्षणाचा आणि भविष्यातील आरोग्य खर्चाचा प्रश्नही काही प्रमाणात मार्गी लागण्याची अपेक्षा आहे.

कुटुंबीयांच्या भवितव्यावर पत्रकार परिषदेत चर्चा

पत्रकार परिषदेत मृत कर्मचाऱ्यांच्या कुटुंबीयांच्या भवितव्याबाबत सविस्तर चर्चा करण्यात आली. दुर्घटनेत कुटुंबातील कर्ता व्यक्ती गमावल्यामुळे निर्माण झालेली पोकळी केवळ आर्थिक मदतीने भरून निघणार नाही. त्यामुळे मुलांचे शिक्षण, कुटुंबाचा उदरनिर्वाह आणि रोजगाराची हमी याबाबत दीर्घकालीन उपाययोजना आवश्यक असल्याचे यावेळी अधोरेखित करण्यात आले.

कंपनीकडून जाहीर करण्यात आलेली ४० लाखांची मदत आणि त्यासोबत शिक्षण, रोजगार व आरोग्य विम्याची हमी यामुळे मोशी दुर्घटनेतील मृत कर्मचाऱ्यांच्या कुटुंबांना संकटाच्या काळात काहीसा आधार मिळणार आहे.