“जगाच्या भल्यासाठी हल्ला रद्द करतोय!”: डोनाल्ड ट्रम्प यांची मोठी घोषणा
Donald Trump | अमेरिकेचे राष्ट्राध्यक्ष डोनाल्ड ट्रम्प यांनी इराणवरील नियोजित लष्करी हल्ला तूर्तास रद्द करण्याची अत्यंत महत्त्वाची आणि मोठी घोषणा केली आहे. इराण आणि मध्यपूर्वेतील इतर देशांनी केलेल्या विशेष विनंतीनंतर, तसेच जागतिक शांततेचा विचार करून हा निर्णय घेतल्याची माहिती ट्रम्प यांनी ‘ट्रूथ’ (Truth Social) या आपल्या सोशल मीडिया प्लॅटफॉर्मवरून दिली आहे.
अमेरिकेने इराणविरुद्ध दुसऱ्या महायुद्धानंतरची सर्वात मोठी लष्करी तयारी केली होती आणि अत्यंत तीव्र व शक्तिशाली कारवाईसाठी फौज तैनात केली होती. मात्र, इराणसोबत एका कराराची प्राथमिक रूपरेषा ठरल्यामुळे हा हल्ला ऐनवेळी रोखण्यात आला आहे.
या नव्या शांतता करारामध्ये होर्मुझची सामुद्रधुनी आंतरराष्ट्रीय वाहतुकीसाठी त्वरित व पूर्णपणे खुली करणे आणि इराणचा आण्विक धोका कायमचा संपवणे या प्रमुख अटींचा समावेश आहे. ट्रम्प यांनी स्पष्ट केले की, “जगाच्या भविष्यातील फायद्यासाठी आणि एका यशस्वी व समृद्ध इराणच्या अस्तित्वासाठी मी हा हल्ला रद्द करण्यास सहमती दर्शवली आहे; मात्र हे सर्व किती वेगाने करार पूर्ण होतो यावर अवलंबून असेल. या वचनबद्धतेत इस्रायलही अमेरिकेसोबत आहे.” ट्रम्प यांनी संबंधित अधिकाऱ्यांना हा करार तातडीने पूर्ण करण्याचे आदेश दिले आहेत.
हेही वाचा
बॉक्सिंगमध्ये भारताच्या लेकींचा डंका! प्रीती पवार अन् जास्मिन लम्बोरियाची सुवर्णमय कामगिरी
इराणचा आक्रमक पवित्रा: आक्रमणाला चोख प्रत्युत्तर देणार!
दुसरीकडे, इस्त्रायलने यावर त्वरित कोणतीही जाहीर प्रतिक्रिया दिली नसली तरी इराणने अमेरिकेला स्पष्ट इशारा दिला आहे. अमेरिकेने हल्ल्याची धमकी अमलात आणल्यास त्याला सडेतोड उत्तर दिले जाईल, असे तेहरानने स्पष्ट केले. कुवेतच्या लष्कराने इराणकडून डागलेले शत्रूचे ड्रोन नष्ट केल्याची घटना घडल्यानंतर, इराणचे परराष्ट्र मंत्री अब्बास अराघची यांनी शनिवारी तुर्की, पाकिस्तान आणि सौदी अरेबियाच्या वरिष्ठ अधिकाऱ्यांशी दूरध्वनीवरून चर्चा केली.
पाकिस्तानचे लष्करप्रमुख फील्ड मार्शल असीम मुनीर, तुर्कीचे परराष्ट्र मंत्री हाकान फिदान आणि सौदीचे परराष्ट्र मंत्री प्रिन्स फैसल बिन फरहान यांच्याशी बोलताना अराघची यांनी सांगितले की, “अमेरिकेच्या अस्थिर करणाऱ्या कारवायांचे परिणाम संपूर्ण प्रदेशाला भोगावे लागतील. अमेरिका किंवा इस्रायलचा कोणताही हल्ला झाल्यास, किंवा त्यात कोणत्याही प्रादेशिक देशाचा सहभाग असल्यास त्याला जशास तसे (प्रमाणशीर) चोख प्रत्युत्तर दिले जाईल.”
महाईन्यूज-X वर फॉलो करा : महाईन्यूजला instagram वर फॉलो करा
