भालाफेकमध्ये भारताचा ऐतिहासिक डंका! नीरज चोप्राला रौप्य, तर यशवीर सिंगला कांस्य पदक
CWG Javelin Throw | ग्लासगो येथे सुरू असलेल्या राष्ट्रकुल क्रीडा स्पर्धेत (Commonwealth Games) भारताच्या भालाफेकपटूंनी इतिहास रचला आहे. शुक्रवारी, ३१ जुलै रोजी मध्यरात्री पार पडलेल्या पुरुषांच्या भालाफेक (Javelin Throw) प्रकारातील अत्यंत अटीतटीच्या अंतिम फेरीत भारताने दुहेरी यश संपादन केले आहे. भारताचा ‘गोल्डन बॉय’ नीरज चोप्रा याने ८५.८३ मीटर भाला फेकून रौप्य पदकावर आपले नाव कोरले, तर पदार्पण करणाऱ्या यशवीर सिंग याने अखेरच्या प्रयत्नात सनसनाटी कामगिरी करत कांस्य पदक पटकावून सर्वांनाच आश्चर्यचकित केले.
दरम्यान, श्रीलंकेच्या युवा खेळाडू रुमेश थरंगा पाथिरागाने ८९.७३ मीटरचा जबरदस्त थ्रो करत सुवर्णपदक पटकावले. २००६ नंतर राष्ट्रकुल स्पर्धेत श्रीलंकेने जिंकलेले हे पहिलेच सुवर्णपदक ठरले आहे.
दुखापतीमुळे मागील (२०२२) राष्ट्रकुल स्पर्धेला मुकलेल्या नीरज चोप्राने या फेरीत सावध सुरुवात केली. मात्र, दुसऱ्या फेरीत त्याने ८५.८३ मीटर अंतर गाठत या हंगामातील स्वतःचा सर्वोत्तम थ्रो नोंदवला आणि तात्पुरते अव्वल स्थान मिळवले. परंतु, त्याच फेरीत श्रीलंकेच्या पाथिरागाने ८९.७३ मीटरचा जबरदस्त थ्रो करून नीरजची आघाडी मोडून काढली. पुढील चार फेऱ्यांमध्ये नीरजला हा टप्पा ओलांडता न आल्याने, २०१८ मधील सुवर्णपदक विजेत्या नीरजला यंदा रौप्यपदकावर समाधान मानावे लागले.
हेही वाचा
‘भारतीय संस्कृती आणि भाषांचे वेगळेपण जगासमोर ठळकपणे मांडण्याची गरज’; मुख्यमंत्री देवेंद्र फडणवीस
Champions know. 💫
The javelin was still in the air. The message was already clear. 🔥
Neeraj Chopra’s second throw travelled 85.83m, his season’s best. 🤩
Watch the Commonwealth Games Glasgow 2026 LIVE & EXCLUSIVE on Sony Sports Network TV channels & Sony LIV.… pic.twitter.com/OZpCUfPVFA
— Sony Sports Network (@SonySportsNetwk) July 31, 2026
यशवीर सिंगचा अखेरच्या प्रयत्नात सनसनाटी थ्रो
अंतिम सामन्यात सर्वात मोठा धक्का दिला तो जयपूरच्या तरुण खेळाडू यशवीर सिंगने. पहिल्या पाच फेऱ्यांअखेर ८१.३३ मीटरच्या कामगिरीसह यशवीर सहाव्या स्थानावर होता आणि तो पदकाच्या शर्यतीतून बाहेर पडल्याचे दिसत होते. मात्र, सहाव्या आणि अखेरच्या प्रयत्नात त्याने ८५.४१ मीटरचा कारकिर्दीतील सर्वोत्तम थ्रो करत थेट तिसऱ्या स्थानावर झेप घेतली आणि कांस्य पदक निश्चित केले. या स्पर्धेत सहभागी झालेला भारताचा तिसरा खेळाडू रोहित यादव सहाव्या स्थानावर राहिला.
ऑलिम्पिक विजेता अर्शद नदीम पहिल्याच फेरीत बाहेर
या अंतिम लढतीत दुसरा सर्वात मोठा धक्का पाकिस्तानच्या अर्शद नदीमला बसला. गतविजेता आणि विद्यमान ऑलिम्पिक सुवर्णपदक विजेता असलेला अर्शद दुखापतीनंतर या स्पर्धेत उतरला होता. मात्र, सुरुवातीच्या तिन्ही प्रयत्नांत त्याला ८० मीटरचा टप्पाही ओलांडता आला नाही. त्यामुळे तो अव्वल आठ खेळाडूंमध्ये स्थान मिळवू शकला नाही आणि पहिल्याच फेरीत स्पर्धेतून बाहेर पडला.
महाईन्यूज-X वर फॉलो करा : महाईन्यूजला instagram वर फॉलो करा
