शिष्यवृत्तीपोटी 95 लाख विद्यार्थ्यांच्या बँक खात्यात जमा
- समाज विकास अधिकारी संभाजी ऐवले यांची माहिती
पिंपरी / महाईन्यूज
पिंपरी-चिंचवड महापालिका नागरवस्ती विकास योजना विभागाकडील मागासवर्गीय कल्याणकारी योजनेंतर्गत इयत्ता पाचवी ते दहावीच्या विद्यार्थ्यांना शिष्यवृत्ती वाटप करण्यात आली. इयत्ता पाचवी ते सातवीच्या 805 आणि आठवी ते दहावीच्या 1 हजार 852 विद्यार्थ्यांना शिष्यवृत्तीपोटी एकूण 95 लाख 2 हजार रुपये पालिकेने अदा केले आहेत, अशी माहिती समाज विकास अधिकारी संभाजी ऐवले यांनी दिली.
महापालिकेच्या 2020-21 या आर्थिक वर्षातील विद्यार्थ्यांच्या शिष्यवृत्तीचा लाभ देण्यासाठी अर्ज मागविले होते. प्रपत्र अ मधील इयत्ता पाचवी ते सातवीमधील 805 विद्यार्थ्यांनी अर्ज केले होते. त्यांना प्रत्येकी चार हजार रुपये प्रमाणे 32 लाख 20 हजार रुपये शिष्यवृत्तीपोटी देण्यात आले. प्रवत्र ब मधील इयत्ता आठवी ते दहावीच्या एकूण 1047 विद्यार्थ्यांचे अर्ज प्राप्त झाले होते. त्यांना सहा हजार रुपये प्रमाणे 62 लाख 82 हजार रुपये वाटप करण्यात आले. शिष्यवृत्तीपोटी पालिकेने एकूण 95 लाख 2 हजार रुपयांचा निधी खर्ची घातला आहे. त्यामुळे आर्थिक दृष्ट्या विद्यार्थ्यांना मदत होणार आहे. ही रक्कम डीबीटीद्वारे विद्यार्थ्यांच्या बँक खात्यामध्ये जमा करण्यात आले आहेत, अशी माहिती अधिकारी ऐवले यांनी सांगितली.