मुंबई : महाराष्ट्रात गेल्या तीन दिवसात 25 हजारांपेक्षा जास्त नवे कोरोनाबाधित रुग्ण आढळले आहेत. विशेष म्हणजे गेल्या तीन दिवसांपासून दररोज 8 हजारांपेक्षा जास्त नव्या कोरोनाबाधितांची नोंद होत आहे. त्यामुळे महाराष्ट्रातील कोरोना रुग्णांचा आकडा 3 लाखांच्या पार गेला आहे. कोरोनावर मात करणाऱ्या रुग्णांची संख्या वाढत असली तरी नव्या कोरोनाबाधितांचा वाढता आकडा चिंतेची बाब आहे .
राज्यात शनिवारी (18 जुलै) दिवसभरात 8 हजार 348 नवे कोरोनाबाधित रुग्ण आढळले. त्यामुळे कोरोनाबाधितांचा आकडा 3 लाख 937 वर पोहोचला आहे. त्याआधी म्हणजे 17 जुलै रोजी 8 हजार 308 नवे रुग्ण आढळले होते. तर 16 जुलै रोजी राज्यात सर्वाधिक 8 हजार 614 नव्या रुग्णांची नोंद झाली होती.
राज्यात शनिवारी दिवसभरात 5 हजार 306 रुग्णांनी कोरोनावर मात केली. त्यामुळे त्यांना रुग्णालयातून डिस्चार्ज देण्यात आला. राज्यात आतापर्यंत 1 लाख 65 हजार 663 रुग्ण बरे झाले आहेत. तर 1 लाख 23 हजार 377 रुग्णांवर उपचार सुरु आहेत. राज्यातील रुग्ण बरे होण्याचं प्रमाण 55.50 टक्क्यांवर पोहोचलं आहे, अशी माहिती आरोग्यमंत्री राजेश टोपे यांनी दिली.
