मुंबई – राज्याचे आरोग्यमंत्री दीपक सावंत यांनी आपल्या मंत्रीपदाचा राजीनामा मुख्यमंत्री देवेंद्र फडणवीस यांच्याकडे सुपूर्द केला आहे. दीपक सावंत शिवसेनेच्या कोटयातून मंत्री होते. डॉ. सावंत यांच्या विधान परिषद सदस्यत्वाची मुदत ७ जुलै २०१८ रोजी संपली. त्यानंतरही ते मंत्रिपदावर कार्यरत होते. कोणत्याही मंत्र्याला विधिमंडळाच्या सहा महिन्यांच्या कालावधीत दोन्ही सभागृहांपैकी एका सभागृहाचे सदस्य म्हणून निवडून येण्याचे घटनात्मक बंधन आहे.
शिवसेनेने सावंत यांच्या जागी मंत्रिपदासाठी दुसरे नाव सुचविण्याबाबत मुख्यमंत्री देवेंद्र फडणवीस यांनी शिवसेना पक्षप्रमुख उद्धव ठाकरे यांच्याशी चर्चा केली. पंतप्रधान नरेंद्र मोदी व भाजप अध्यक्ष अमित शहा यांच्यावर टीकास्त्र सोडत अयोध्येतील राम मंदिरप्रश्नी संघर्षांची भूमिका घेतली असताना एका मंत्रिपदाची अभिलाषा ठेवून नवीन नावाची शिफारस करण्यावरुन शिवसेनेत संभ्रम असून ठाकरे सोमवारी अंतिम निर्णय घेणार आहेत.
