पुणेः येत्या २७ ऑगस्ट रोजी माजी खासदार राजू शेट्टी हे बारामतीत दुध उत्पादकांसमवेत प्रांताधिकारी कार्यालयावर मोर्चा काढणार आहेत. राजू शेट्टी यांचे महाविकास आघाडीशी सूत जुळल्यानंतरही ते येथे मोर्चा काढत आहेत. राज्यातील एकूण संकलित दूध उत्पादनापैकी निम्मे दूध पुणे जिल्ह्यातच संकलित होत असल्याने दुधाचे आंदोलन येथून सुरू करण्याचा निर्णय त्यांनी घेतल्याचा राजकीय अंदाज बांधला जात आहे.
राज्यातील दुध उत्पादकांची मोठ्या प्रमाणावर पिळवणूक होत असून २५ रुपये प्रतिलिटरचा दर राज्यात शेतकऱ्यांच्या पोरांचे सरकार आल्यानंतरही १७ ते १८ रुपयांवर घसरला आहे. उत्पादन खर्चापेक्षा निम्म्या दराने दुध उत्पादकांना दर मिळत असून प्रतिलिटर ३० ते ३५ रुपये उत्पादन खर्च असलेल्या दुधाचा दर वाढवून द्यावा, दुधावरील जीएसटी रद्द करावी, केंद्र सरकारने दुधाच्या भुकटी आयातीचा निर्णय रद्द करावा अशा विविध मागण्या घेऊन स्वाभिमानीने दुध दर आंदोलन सुरू केले आहे.
येत्या २७ ऑगस्ट रोजी बारामतीतील प्रांत कार्यालयावर स्वाभिमानी शेतकरी संघटना मोर्चा काढणार आहे. या मोर्चात शेतकऱ्यांनी सहभागी व्हावे असे आवाहन शेट्टी यांनी केले असून या आंदोलनातून स्वाभिमानी शेतकरी संघटनेला नेमकी कशी राजकीय उभारी मिळते हे पाहणे उत्सुकतेचे ठरणार आहे.
