पुणे : मुंबई-बंगळुरू बाह्यवळण मार्गावर भरघाव कारच्याच्या धडकेने महिलेचा मृत्यू झाल्याची घटना घडली. नवले पुलाजवळ ही घटना घडली. अपघातात तिघे जखमी झाले असून त्यांच्यावर रुग्णालयात उपचार सुरू असल्याची माहिती पोलिसांनी दिली. जखमींमध्ये चार वर्षांच्या बालकाचा समावेश आहे.
योजना शिवशंकर महंत (वय ३२, रा. बिबवेवाडी) असे मृत्युमुखी पडलेल्या महिलेचे नाव आहे. अपघातात योजना यांचे पती शिवशंकर सुभाष महंत (वय ३६), त्यांचा मुलगा शिवांश (वय ४), अमोल भीमराव सुरवसे (वय ३७, रा. मोशी) जखमी झाले आहेत. पोलिसांनी दिलेल्या माहितीनुसार, शिवशंकर महंत आणि अमोल सुरवसे मित्र आहेत. सुरवसे आणि महंत कुटुंबीय शनिवारी (१९ नोव्हेंबर) सकाळी काेकणात पर्यटनासाठी निघाले होते. अमोल सुरवसे, त्यांची पत्नी, लहान मुलगी बाह्यवळण महामार्गावर मोटारीत महंत कुटुंबीयांची वाट पाहत थांबले होते. महंत कुटुंबीय कारमधून तेथे आले.
