सांगली जिल्ह्यातील इस्लामपूर येथे करोनाबाधित २४ रुग्ण आढळून आले आहेत. या भागातील वाढत्या रुग्णांच्या संख्येची गंभीर दखल घेऊन मिरज येथील शासकीय वैद्यकीय कॉलेजशी संलग्न असलेल्या रुग्णालयाचे करोना रुग्णालयात रूपांतर करण्याचा निर्णय घेण्यात आल्याची माहिती वैद्यकीय शिक्षणमंत्री अमित विलासराव देशमुख यांनी रविवारी दिली.
इस्लामपूर येथे अचानक वाढलेल्या करोना रुग्णांची संख्या लक्षात येताच मुंबईतील जे. जे. समूह रुग्णालयाच्या अधिष्ठाता डॉ. पल्लवी सापळे यांच्या अध्यक्षतेखाली तातडीने त्रिसदस्यीय समिती नियुक्त करण्यात आली आहे. डॉ. सापळे यांनी मिरजला भेट देऊन येथील शासकीय वैद्यकीय कॉलेज रुग्णालयाचे तातडीने ३०० खाटांच्या करोना रुग्णालयात रूपांतर केले आहे. रुग्णालयात १५ आयसीयू बेड, सिटीस्कॅन, एमआरआय या सुविधाही उपलब्ध करण्यात आल्या आहेत. या ठिकाणी येत्या तीन ते चार दिवसांत तपासणी केंद्रही सुरू करण्यात येणार आहे.
मिरज येथील शासकीय वैद्यकीय रुग्णालयातील सर्व रेसिडेंट डॉक्टर्स, नर्सिंग स्टाफ, वाहनचालक व अन्य कर्मचाऱ्यांना प्रशिक्षण देण्याचे काम सुरू करण्यात आले आहे. आठवडाभरात हे प्रशिक्षण पूर्ण करण्यात येईल, असे देशमुख यांनी सांगितले. दरम्यान, मिरजेच्या रुग्णालयास सांगली जिल्ह्याचे पालकमंत्री जयंत पाटील यांनी भेट देऊन तेथील रुग्णांच्या प्रकृतीची विचारपूस केली. सर्व रुग्णांची प्रकृती स्थिर असल्याचे त्यांनी नंतर पत्रकारांना सांगितले. या भेटीत मिरज शासकीय वैद्यकीय कॉलेजचे अधिष्ठाता डॉ, नणंदर आणि जिल्हा शल्य चिकीत्सक डॉ. संजय साळुंखे यांच्याशी चर्चा केली.
