मावळातील पाचाणे-पुसाणे गावच्या हद्दीत बिबट्याचा मृतदेह आढळला
लोणावळा – मावळ तालुक्यातील पाचाणे-पुसाणे गावच्या हद्दीत बिबट्याचा मृतदेह आढळला आहे. बिबट्याचे चार पाय व डोके कापून नेले असून, शिकारीसाठीच बिबट्याची हत्या झाल्याचा संशय व्यक्त करण्यात येत आहे. गुरुवारी रात्री साडेदहा वाजण्याच्या सुमारास हा प्रकार समोर आला.
पोलिसांनी दिलेल्या माहितीनुसार, पाचाणे पुसाणे येथील काही शेतकऱ्यांना उग्र वास आल्याने त्यांनी त्या दिशेने जाऊन पाहणी केली असता, त्यांना मृतावस्थेतील बिबट्या दिसला. त्यांनी या घटनेची माहिती वन विभागाला दिली. यानंतर वन विभागाच्या वरिष्ठ अधिकाऱ्यांनी घटनास्थळी धाव घेत पाहणी केली. या वेळी बिबट्याचे चार पाय व डोके कापून नेल्याचे समोर आले. बिबट्याच्या नखांसाठी शिकार केली असल्याचा संशय व्यक्त करण्यात येत आहे. पुढील तपास मावळ वन विभाग आणि पोलिसांच्या वतीने करण्यात येत आहे. काही वर्षांपूर्वी भोर तालुक्यात अशाच पद्धतीने दोन-तीन बिबट्यांचा मृत्यू झाला होता. गेल्या काही दिवसांपासून जिल्ह्यात शिकारीसाठी बिबट्यांची हत्या होण्याचे प्रकार वाढल्याने वन विभागाने आणि पोलिसांनीही तस्करी रोखण्यासाठी ठोस पावले उचलावीत, अशी मागणी प्राणी प्रेमींकडून केली जात आहे.
