मनसेशी युतीची शक्यता नाही – विनोद तावडे
मुंबई | महाईन्यूज
महाराष्ट्र नवनिर्माण सेनेची (मनसे) भूमिका प्रादेशिकवादाची असल्याने त्यांच्याबरोबर भाजपची युती होण्याची शक्यता नसल्याचे ज्येष्ठ भाजपनेते विनोद तावडे यांनी गुरुवारी स्पष्ट केले आहे. शिवसेनेने काँग्रेस-राष्ट्रवादी काँग्रेसबरोबर सरकार स्थापन केल्याने हिंदूुत्ववादी मतदार त्यांच्यावर नाराज झाले असून त्यांना भाजपकडे आकर्षित करण्याचा प्रयत्न करणार असल्याचे तावडे यांनी स्पष्ट केले आहे.
शिवसेना काँग्रेस-राष्ट्रवादी काँग्रेसबरोबर सत्तेत गेल्यानंतर मनसेने आता प्रखर हिंदूुत्वाची कास धरली आहे. माजी मुख्यमंत्री देवेंद्र फडणवीस यांनी मनसे अध्यक्ष राज ठाकरे यांची नुकतीच भेट घेतली होती. त्यानंतर भाजप-मनसे युतीची चर्चा सुरू झाली आहे. पण भाजप हा राष्ट्रीय पक्ष असून मनसेच्या प्रादेशिकवादाच्या भूमिकेमुळे भाजपचे नुकसान होईल. त्यामुळे मनसेबरोबर युती करू नये, असा भाजपमध्ये मतप्रवाह आहे.