पिंपरी |महाईन्यूज|
धुळवडीचा रंग खेळताना आठ वर्षांच्या चिमुरड्यावर रंग समजून अॅसिड फेकल्याची गंभीर घटना समोर आली आहे. यामध्ये मुलगा गंभीर जखमी झाला आहे. या प्रकरणी अकरा वर्षांच्या मुलावर गुन्हा दाखल करण्यात आला आहे. जखमी मुलावर रुग्णालयात उपचार सुरू आहेत.
सांगवी परिसरात मंगळवारी सायंकाळी ही घटना घडली असून रात्री उशिरा गुन्हा दाखल करण्यात आला आहे. पोलिसांनी दिलेल्या माहितीनुसार, दोन्ही मुलं मंगळवारी सकाळी साडे आठ वाजण्याच्या सुमारास धुळवडीच्या निमित्तानं रंग खेळत होती. एकमेकांच्या अंगावर रंग उडवत होती. त्याचवेळी आठ वर्षीय अल्पवयीन मुलाच्या अंगावर आरोपी मुलानं पांढऱ्या रंगाच्या बाटलीतील अॅसिड अंगावर फेकले. यात तो गंभीर भाजला. आई-वडिलांना हे कळताच त्यांनी तात्काळ आपल्या मुलाला रुग्णालयात दाखल केले. त्याच्यावर उपचार सुरू करण्यात आले आहेत.
मुलं ज्या ठिकाणी खेळत होती, तिथं घरातील स्वच्छतेसाठी रंगीत ॲसिड आणून ठेवले होते. खेळता खेळता मुलांपैकी एकाने अॅसिड असलेली बाटली उचलली आणि दुसऱ्याच्या अंगावर भिरकावली. ॲसिड अंगावर उडाल्यानंतर जखमी मुलाच्या अंगावर जखमा होऊ लागल्या त्यातून ही घटना उघडकीस आली. अॅसिड फेकणाऱ्या मुलाला ताब्यात घेण्यात आलं असून त्याची चौकशी केली जात आहे. या प्रकरणी जखमी मुलाच्या वडिलांनी पोलिसांत फिर्याद दिली आहे.
