बंगळुरूचा हैदराबादवर 14 धावांनी विजय
बंगळुरू – अखेरच्या दोन षटकांमध्ये गोलंदाजांनी केलेल्या प्रभावी माऱ्यामुळे बंगळुरूने हैदराबादचा 14 धावांनी पराभव करत बाद फेरीत पोहोचण्याचे आपले आव्हान जिवंत ठेवले आहे. बंगळुरूने प्रथम फलंदाजी करताना 6 गडी बाद 218 धावा केल्या होत्या. प्रत्युत्तरात फलंदाजी करताना हैदराबादचा डाव 20 षटकांत 3 बाद 204 धावांत आटोपला.
केन विल्यम्सन आणि मनिष पांडे यांच्या फटकेबाजी मुळे हैदराबादने बंगळुरूच्या धावांच्या आव्हानाचा पाठलाग करताना हैदराबादने पहिल्या सहा षटकांत 56 धावा केल्या होत्या. यावेळी सलामीवीर शिखर धवन केवळ 18 धावा करून परतला. धवन परतल्यानंतर ऍलेक्स हेल्सने फटकेबाजीचा प्रयत्न केला. मात्र ऍब डिव्हिलिअर्सने उत्कृष्ट झेल टिपत त्याला माघारी धाडले. हेल्सने 24 चेंडूत 37 धावांची खेळी केली. त्यानंतर केन विल्यम्सनने मनिश पांडेला सोबतीला घेऊन फटकेबाजी करत हैदराबादच्या धावगतीला वाढवले.
मात्र 16व्या षटकात साऊदीने केवळ 6 धावा देत सामन्यात पुनरागमन केले. त्यामुळे हैदराबादला शेवटच्या षटकात विजयासाठे 20 धावांची आवश्यकता होती. यावेळी अखेरच्या षटकात पहिल्याच चेंडूवर विल्यम्सन बाद झाला त्याने 42 चेंडूत 81 धावांची खेळी केली तर पांडे सोबत 11 षटकात 135 धावांची भागीदारी केली. यावेळी पांडेने नाबाद 62 धावांची महत्वपूर्ण खेळी केली.
तत्पूर्वी, ऍब डीव्हिलिअर्स आणि मोईन अली यांची वेगवान अर्धशतके आणि कॉलिन डी ग्रॅंडहोमच्या समयोचित खेळीमुळे रॉयल चॅलेंजर्स बंगळुरू संघाला सनरायजर्स हैदराबाद संघासमोर विजयासाठी 219 धावांचे आव्हान ठेवता आले. नाणेफेक गमावून पहिल्यांदा फलंदाजी करताना बंगळुरू संघाने निर्धारित 20 षटकांत 6 बाद 218 धावांची मजल मारली. हैदराबादने सुरुवातीच्या षटकांमध्ये पार्थिव पटेल व विराट कोहलीच्या रुपाने बंगळुरूला दोन हादरे दिले. परंतु ऍब डीव्हिलिअर्स व मोईन अली यांनी 107 धावांची भागीदारी करीत बंगळुरूचा डाव सावरला. डीव्हिलिअर्सने 39 चेंडूंत 69 धावा केल्या. तर मोईनने 34 चेंडूत 65 धावांची वेगवान खेळी केली.
रशीद खानने या दोघांनाही एकाच षटकांत बाद केले. मात्र कॉलिन डी ग्रॅंडहोमने 17 चेंडूंत 1 चौकार व 4 षटकारांसह 40 धावा केल्या. तर सर्फराझ खानने (नाबाद 22) खेळी करीत बंगळुरूला 218 धावांची मजल मारून दिली. हैदराबादच्या बेसिल थंपीने 4 षटकांत 70 धावा देताना आयपीएलमध्ये सर्वाधिक धावा देण्याचा विक्रम केला.