निश्चित दरांपेक्षा अधिक भाडे आकारल्यामुळे पुण्यात दोन रुग्णवाहिकांवर कारवाई

प्रादेशिक परिवहन प्राधिकरणाने निश्चित करून दिलेल्या दरांपेक्षा अधिक भाडे आकारल्यामुळे पुण्यात दोन रुग्णवाहिकांवर कारवाई करण्यात आली आहे. तसेच दोन्ही रुग्णवाहिका ताब्यात घेण्यात आल्या आहेत.

कोरोनाच्या पार्श्वभूमीवर रुग्णवाहिकेच्या मालकांनी रुग्णांची वाहतूक करताना प्रादेशिक परिवहन प्राधिकरणाने निश्‍चित केलेले दर रुग्णवाहिकांत दर्शनी भागात प्रदर्शित करावेत व निर्धारित दरापेक्षा जास्त दर आकारणी करू नये, अशा सूचना देण्यात आल्या होत्या. मात्र, याबाबत दोन तक्रारी जिल्हाधिकारी कार्यालयाकडे करण्यात आल्या होत्या. त्यानंतर जिल्हाधिकाऱ्यांच्या आदेशानुसार संबंधितांवर कारवाई करण्यात आली आहे, अशी माहिती प्रादेशिक परिवहन अधिकारी अजित शिंदे यांनी दिली. मोटार वाहन निरीक्षक सुरेश आवाड आणि विजय लोखंडे यांच्या पथकाने ही कारवाई केली.

डेक्कन येथून कोथरूड परिसरात जाण्यासाठी २,५०० रुपये भाडे आकारण्यात आले. त्यात ‘अॅम्ब्युलन्स चार्ज’ दीड हजार, वॉशिंग चार्ज ५०० रुपये, वेटिंग चार्ज ३०० रुपये आणि हेल्पर चार्ज २०० रुपये आकारण्यात आले. यात रुग्णवाहिका चालकाने दिलेल्या पावतीनुसार संबंधितांचा प्रवास ३५ मिनिटांत पूर्ण झाला आहे. चालकाला प्रतीक्षा नियमानुसार एक तासासाठी १०० रुपये चार्ज आहे. करावी लागली नाही; तरीही त्याने ३०० रुपये ‘वेटिंग चार्ज’ लावला; तसेच ॲम्ब्युलन्स चार्ज व्हॅनसाठी दोन तास किंवा २५ किलोमीटरसाठी ५०० रुपये असतानाही १५०० रुपये आकारण्यात आले आहेत.

एका प्रकारात कार्डिअॅक ॲम्ब्युलन्ससाठी चार किलोमीटरसाठी सात हजार रुपये भाडे आकारण्यात आले आहे. त्यात ॲम्ब्युलन्स चार्ज चार हजार रुपये, डॉक्टर फी दोन हजार रुपये आणि ‘पीपीई किट’चे एक हजार रुपये आदींचा समावेश आहे.’आरटीओ’च्या वायुवेग पथकाने दोन्ही अॅम्ब्युलन्स ताब्यात घेतल्या आहेत. संबंधित वाहनांविरुद्ध मोटार वाहन कायद्यातील तरतुदीनुसार कारवाई करण्यात आली आहे.