पुणे |महाईन्यूज|
डॉक्टरांचे प्रिस्क्रिप्शन (चिठ्ठी) असल्याशिवाय ‘एन-९५ मास्क’ची विक्री आता औषध विक्रेत्यांना करता येणार नाही. त्याबाबत प्रत्येक जिल्ह्यातील अन्न व औषध प्रशासन (एफडीए) कार्यालयाने दखल घ्यावी, असे निर्देश राज्याचे ‘एफडीए’चे आयुक्त अरुण उन्हाळे यांनी शुक्रवारी दिले. मास्कची साठेबाजी करणाऱ्यांवर कारवाई करण्याचा इशाराही देण्यात आला आहे.
यासंदर्भात एफडीएने परिपत्रक जाहीर केले आहे. ‘पर्सनल प्रोटेक्टिव्ह इक्विपमेंट’ (पीपीई कीट) व ‘एन- ९५’ मास्क जो डॉक्टरांसाठी असतो त्याची विक्री औषध दुकानांतून होते. यापैकी मास्कची खरेदी सध्या नागरिकांकडून मोठ्या प्रमाणात केली जात आहे. यातील मास्कची विक्री करताना मूळ किंमतीच्या व्यतिरिक्त दुकानदाराकडून जादा दर आकारणी होत असल्याचे निदर्शनास आले आहे. तशा तक्रारी सरकारकडे आल्या आहेत. त्याचप्रमाणे अनावश्यक खरेदी करून साठा होत असल्याचेही निदर्शनास आले आहे. यास पायबंद होण्याच्या अनुषंगाने व व्यापक जन आरोग्याचा विचार करता ‘पीपीई कीट’ व ‘एन – ९५ मास्क’ची विक्री डॉक्टरांच्या चिठ्ठीशिवाय होणार नाही, याची दक्षता सर्व विभागीय सह आयुक्त, सहायक आयुक्त (औषधे विभाग) यांनी घ्यावी, असे निर्देश आयुक्त अरुण उन्हाळे यांनी दिले आहेत.
करोना विषाणूंचा विविध देशांमध्ये वाढत असलेला संसर्ग लक्षात घेता, राज्यामध्ये विविध पातळ्यांवर ‘कोरोना’बाबत दक्षता घेण्याच्या दृष्टीने नियोजन सुरू केले आहे. या रोगाचा प्रादुर्भाव टाळण्यासाठी आवशक असलेली ‘पीपीई कीट’ व ‘एन-९५ मास्क’चा तुटवडा होण्याची शक्यता नाकारता येत नाही, म्हणून ‘एफडीए’ने याबाबत सूचना दिल्या आहेत. या वस्तूंची साठेबाजी होणार नाही, याबाबत खबरदारी घ्यावी; तसेच या वस्तुंचे उत्पादक, पुरवठादार यांच्याकडील साठ्याची पडताळणी करून योग्य ती कार्यवाही करावी. आपल्या कार्यक्षेत्रातील औषध निरीक्षकांना याबाबत सक्त सूचना देण्यात याव्यात, असे या पत्रामध्ये आयुक्तांनी म्हटले केले आहे.
