गरम मसाल्यातील जायफळमध्ये आरोग्यवर्धक तसंच सौंदर्यवर्धक गुणधर्मही असतात. डागविरहित आणि सुंदर त्वचा मिळवण्यासाठी जायफळ हा सर्वात प्रभावी उपाय आहे. जायफळमध्ये त्वचेचा रंग उजळण्यास उपयुक्त असे गुणधर्म आहेत.
चेहऱ्यावर चमक हवी असल्यास जायफळचा वापर करून घरगुती फेसपॅक तयार करा. जायफळ फेसपॅकमुळे तुमच्या त्वचेला भरपूर पोषकतत्त्वांचा पुरवठा होईल. धूळ, माती, प्रदूषणामुळे त्वचेवर झालेल्या दुष्परिणामांपासूनही तुमची सुटका होण्यास मदत मिळेल. जाणून घेऊया जायफळ फेसपॅक तयार करण्याच्या पद्धती
जायफळमध्ये मॅग्नेशियम, मॅगनिझ, कॉपर, व्हिटॅमिन बी१ आणि व्हिटॅमिन बी ६ या घटकांचा समावेश आहे. शिवाय यामध्ये त्वचेसाठी पोषक असेही सौंदर्यवर्धक गुण देखील आहेत. जायफळमधील औषधी गुणांमुळे चेहऱ्यावरील डाग, पिगमेंटेशन, सूर्यामुळे काळवंडलेली त्वचा यांसारख्या समस्या कमी होण्यास मदत मिळते.
जायफळ, मध आणि दालचिनी
दोन चमचे जायफळ पावडर, दोन चमचे मध आणि दोन चमचे दालचिनीची पावडर एकत्र करून मिश्रण तयार करा. हा लेप चेहऱ्यावर तीस मिनिटांसाठी लावून ठेवा. या फेसपॅकमुळे चेहऱ्याच्या त्वचेवरील छिद्रांमधील दुर्गंध स्वच्छ होण्यास मदत मिळेल. त्यातील धूळ, मातीचे कण बाहेर येतील. आठवड्यातून तीन वेळा हा उपाय करावा.
जायफळ आणि दूध
एक चमचा जायफळ पावडरआणि त्यामध्ये एक चमचा कच्चे दूध मिक्स करून फेसपॅक तयार करून घ्या. ही पेस्ट चेहऱ्यासह मानेवर ३० मिनिटांसाठी लावून ठेवा. यानंतर थंड पाण्यानं चेहरा स्वच्छ धुऊन घ्या. जायफळ आणि दुधातील पोषकतत्त्वांमुळे चेहऱ्यांवरील बंद झालेले छिंद्रे उघडण्यास मदत मिळते आणि यामुळे चेहऱ्यावर नैसर्गिक चमक येते. हा उपाय तुम्ही आठवड्यातून दोन वेळा करू शकता.
जायफळ, गुलाब पाणी आणि केसर
दोन चमचे जायफळ पावडर, दोन चमचे गुलाब पाणी आणि चिमूटभर केसर ही सामग्री एकत्र करून पेस्ट तयार करा. हा पॅक चेहऱ्यावर १० ते १५ मिनिटांपर्यंत लावून ठेवा आणि साध्या पाण्यानं चेहरा धुऊन घ्या. निस्तेज त्वचेवर नैसर्गिक चमक येईल आणि चेहऱ्याला पोषकतत्त्वे देखील मिळतील. आठवड्यातून एकदा हा फेसपॅक चेहऱ्यावर लावा. केसरमध्ये व्हिटॅमिन सी यांसारखे अँटी-ऑक्सिडेंट आहेत. यापासून त्वचेचं सूर्याच्या हानिकारक किरणांपासून संरक्षण होते.
जायफळ आणि चंदन
एक चमचा जायफळ आणि दोन चमचे चंदन पावडर एकत्र करून फेसपॅक तयार करा. या फेसपॅकमुळे डोळ्यांखालील काळी वर्तुळ तसंच मुरुमांचे डाग कमी होतील. चंदन त्वचेसाठी नैसर्गिक अ‍ॅस्ट्रिजेंट प्रमाणे काम करते. चंदनाचा लेप लावल्यास चेहऱ्यावरील मोठी छिंद्रे बंद होण्यास मदत मिळते. मुरुमांचा त्रासही कमी होतो. डार्क सर्कलसाठी जायफळ केवळ पाण्यातून उगाळून लावल्यासही फायदे मिळतील.
जायफळ आणि नारळाचं दूध
एक चमचा जायफळ पावडर आणि एक चमचा नारळाचं दूध एकत्र तयार करून फेसपॅक तयार करा. या फेसपॅकमुळे त्वचेवरील डाग कमी होतात आणि चेहरा खोलवर स्वच्छ होण्यास मदत होते. नारळाच्या दुधामुळे त्वचेला नैसर्गिक ओलावा मिळतो. चेहऱ्याला थंडावा मिळतो. चेहऱ्याची त्वचा मऊ होते.
