जमिन ताब्यात घेण्यास उभ्या पिकात ट्रॅक्टर घुसवला; खेडमध्ये एका कर्नलसह 35 जवानांवर गुन्हा दाखल
पुणे – खेड तालुक्यातील गुळाणी येथील एका शेतात पेरलेल्या सोयाबीन पिकामध्ये ट्रॅक्टर घुसवून जमीन ताब्यात घेण्याचा प्रयत्न केल्याप्रकरणी खेड पोलिसांनी एक कर्नल आणि ३5 जवानांवर गुन्हा दाखल केला आहे. केदार गायकवाड असे कर्नलचे नाव असून ते शस्त्रांच्या बळावर जमीन ताब्यात घेण्याचा प्रयत्नात होते असा त्यांच्यावर आरोप आहे. कर्नल गायकवाड हे हैदराबाद येथील तोफखाना केंद्रात सेवेत आहेत.
याबाबत खेड पोलिसांनी दिलेल्या माहितीनुसार, खेड मधील खालुब्रे गावच्या रहिवासी मोनिका गणेश गाडे आणि यांच्या बहिणीचे पती सुनील नामदेव भरणे यांनी सन २०१८ मध्ये गुळाणी येथील जमीन खरेदी केली होती. त्यानंतर गाडे आणि भरणे हे या जमिनीचे मालक झाले होते. मात्र, २२ जून या दिवशी कर्नल केदार गायकवाड हे ४ लष्कराच्या गाड्यांमधून ३० ते ४० जवानांना घेऊन शस्त्रासह गुळाणी गावात आले होते. कर्नल गायकवाड हे जवानांना घेऊन गावामध्ये बेकायदा जमाव जमवून, तसेत हातात शस्त्रे घेऊन गावात फिरून दहशत निर्माण होईल असे कृत्य करत होते. त्यानंतर त्यांनी सदर जवानासह गाडे व भरणे यांच्या मालकीच्या शेतात ट्रॅक्टर लावून शेतातील सोयाबीनच्या पिकाचे नुकसान करण्यास सुरुवात केली. परंतु त्यांच्याबरोबर असलेले शस्त्रधारी लष्कराच्या जवानांच्या उपस्थितीमुळे निर्माण झालेल्या भीतीपोटी फिर्यादीने कुठल्याही प्रकारचा विरोध अथवा प्रतिबंध केला नाही.
या प्रकरणी कर्नल केदार गायकवाड यांच्या विरोधात गुन्हा दाखल करण्यात आला असून खेड पोलीस प्रकरणाचा तपास करत आहेत. याबाबात मिळालेल्या माहितीनुसार, गुळाणी येथील रहिवासी परिमल विजय गायकवाड यांच्या कुटुंबातील काही व्यक्तीनी वारसा हक्कांनी मिळालेली जमीन दिलीप नामदेव भरणे विकली होती. मात्र, गायकवाड कुटुंबियांनी ही जमीनवर दावा केला. त्यानंतर या जमिनीचा वाद दिवाणी न्यायालयात दाखल करण्यात आला.
