चिखलीत लवकरच पोटनिवडणूक : भाजपचे कुंदन गायकवाड यांचे नगरसेवक पद रद्द

आयुक्तांनी पहिल्यांदा मुदतवाढ देवूनही अखेर पद रद्द

पिंपरी ( महा ई न्यूज) – महापालिका प्रभाग क्रमांक 1 मधील चिखलीतील भाजपचे कुंदन गायकवाड यांचे नगरसेवक पद रद्द करण्यात आले. बुलढाणा जात पडताळणी समितीने जात प्रमाणपत्र रद्द केल्याने महापालिका आयुक्त श्रावण हर्डिकर यांनी नगरसेवक रद्द केल्याचा आदेश दिला आहे. दरम्यान, नगरसेवक पदावर असताना घेतलेले सर्व भत्ता वसूल करण्यात येणार आहे. त्यामुळे चिखलीतून पुन्हा पोटनिवडणूक लागणार आहे. 

पिंपरी-चिंचवड महापालिकेची सार्वत्रिक निवडणूक फेब्रुवारी 2017 मध्ये झाली. या निवडणुकीत चिखलीतील अनुसूची जाती जमाती प्रवर्गाच्या राखीव प्रवर्गातून कुंदन अंबादास गायकवाड हे भाजपमधून विजयी झाले. त्यांनी कैकाडी जातीचा दाखला सादर करत अनुसूचित जाती प्रवर्गातून निवडणूक लढविली. त्यांचे प्रतिस्पर्धी शिवसेना उमेदवार नितीन दगडू रोकडे यांनी कुंदन गायकवाड यांच्या जात दाखला आणि जात प्रमाणपत्र पडताळणीवर हरकत घेतली. गायकवाड यांचा जात दाखला अवैध असल्याचा निर्णय बुलढाणा जिल्हा विभागीय जात प्रमाणपत्र पडताळणी समितीने मंगळवारी (दि.29) दिला.

कुंदन गायकवाड हे कैकाडी जातीचे असून, ते सोलापूर जिल्ह्यातील मूळ रहिवासी आहेत. सोलापूर जिल्ह्यात कैकाडी ही जात विमुक्त जात या प्रवर्गात मोडते. कुंदन गायकवाड यांनी विमुक्त जात या प्रवर्गातून पुण्यात जमीन मिळविली आहे. त्याबाबतचे पुरावे जात पडताळणी समितीसमोर सादर करण्यात आले. त्या आधारे कुंदन गायकवाड यांचे अनुसूचित जातीचे प्रमाणपत्र बुलढाणा जात प्रमाणपत्र समितीने अवैध ठरविले होते. तसेच त्यांना अनुसूचित जातीचे दिलेले फायदे तत्काळ काढून घेण्याचे आदेशही दिले होते. त्याच प्रमाणे गायकवाड यांनी बनावट कागदपत्रे सादर करून जात पडताळणी समितीची फसवणूक केल्याप्रकरणी त्यांच्या विरोधात कारवाई करण्याचे आदेशही दक्षता पथकाच्या पोलिस निरीक्षकांना दिले होते.

बुलढाणा जिल्हा जात पडताळणी समितीच्या या निर्णयाविरोधात कुंदन गायकवाड यांनी मुंबई उच्च न्यायालयाच्या नागपूर खंडपीठात आव्हान दिले होते. नागपूर खंडपीठाने गायकवाड यांचे जात प्रमाणपत्र अवैध ठरवण्याच्या निर्णयाला 1 सप्टेंबर 2018 पर्यंत स्थगिती आदेश दिले होते. त्यामुळे नगरसेवक गायकवाड यांना दिलासा मिळाला होता. परंतु, ही मुदत संपताच बुलडाणा जिल्हा जात पडताळणी समितीने 29  सप्टेंबर 2018 रोजी नगरसेवक कुंदन गायकवाड यांचे जात प्रमाणपत्र रद्द केल्याचा अंतिम निकाल दिला आहे. गायकवाड यांचा कैकाडी अनुसूचित जातीचा दावा समितीने अमान्य केला आहे. त्यांना अनुसूचित जातीचे म्हणून दिलेले फायदे तत्काळ काढून घेण्याचे  आदेश दिले होते. त्यानुसार आयुक्त श्रावण हर्डीकर यांनी गायकवाड यांचे पद रद्द केले आहे.

सहाय्यक आयुक्त प्रवीण अाष्टीकर म्हणाले, ‘ बुलढाणा जात पडताळणी समितीने नगरसेवक कुंदन गायकवाड यांचे यांचे जात प्रमाणपत्र रद्द रद्द केले आहे. त्याबाबतचा अहवाल शुक्रवारी (दि.5) महापालिकेला प्राप्त झाला. त्यानंतर आयुक्त श्रावण हर्डीकर यांनी गायकवाड यांचे पद्द रद्द केले आहे. त्याबाबतचे आदेश पारित केला आहे. या आदेशाची प्रत गायकवाड, नगरविकास विभाग, राज्य निवडणूक आयोग आणि पालिकेच्या नगरसचिव विभागाला पाठविली आहे. गायकवाड यांना दिलेले सर्व भत्ते वसूल केले जाणार आहेत’.