औरंगाबादमध्ये जनता कर्फ्यूला चांगला प्रतिसाद; बाजार,रस्ते आणि गल्ल्यांमध्येही शुकशुकाट

औरंगाबादमध्ये आजपासून ८ दिवस हा जनता कर्फ्यू पाळला जाणार आहे. आज सकाळपासूनच कडक संचारबंदीला सुरू झाली आहे. चौका- चौकात पोलिसांचे तपासणी पथक आणि बंदोबस्त तैनात करण्यात आले आहे. शहरातील नवीन औरंगाबाद अशी ओळख असलेल्या टी.व्ही. सेंटर, सिडको भागात सकाळपासून शुकशुकाट असून केवळ वर्तमानपत्र विक्रेते, दूध विक्रेते आणि अत्यावश्यक सेवेतील उद्योगांमधे जाणाऱ्या कर्मचाऱ्यांची चौकात तुरळक उपस्थिती होती. ॉ

चौकाचौकात कडक पोलीस बंदोबस्त तैनात करण्यात आला होता. प्रत्येक वाहनधारक, दुचाकी स्वराची कसून चौकशी करण्यात येत होती. ओळखपत्र असलेल्या आणि परवानगी असलेल्या बँक आणि इतर आस्थापनाच्या कर्मचाऱ्यांना देखील अडवून चौकशी करण्यात आली. पोलीस आयुक्त चिरंजीव प्रसाद यांनी शहराचा फेरफटका मारत बंदोबस्ताचा आढावा घेतला. आजपासून ८ दिवस हा जनता कर्फ्यू राहणार आहे.

पेट्रोल पंपावर सुद्धा शुकशुकाट पहायला मिळतोय. जळगाव रोडवर असलेल्या पेट्रोल पंपावर वाहनधारकांची गर्दी झाली होती. मात्र केवळ शासकीय वाहने आणि अत्यावश्यक सेवा असलेल्या वाहनांनाच सकाळी ९ ते १ या वेळेत पेट्रोल- डिझेल देणार असा फलक पेट्रोलपंप चालकांनी लावला होता. काही वाहनधारक ९ वाजण्याची वाट पाहत पेट्रोलपंपासमोरच थांबले होते.

टी पॉइंटवर देखील पोलिसांचा फौजफाटा तैनात करण्यात आला आहे. सिल्लोड, फुलंब्री तसेच पुढे जळगावला जाण्यासाठी जळगाव टी पॉईंटच्या याच पोलीस चौकीला पार करून जावे लागते. या टी पॉइंटवर पोलीस तैनात करण्यात आलेत. येथे सकाळच्या सत्रात आरोग्य तपासणी पथक नसले तरी पोलिसांकडून शहरात येणाऱ्या प्रत्येक वाहनधारकांची कसून चौकशी करण्यात येत आहे.

लॉकडाऊनची कडक अंमलबजावणी व्हावी म्हणून संपूर्ण शहरात पोलिसांचा मोठा बंदोबस्त ठेवण्यात आला होता. चिश्तीया चौकात पोलिसांकडून पादचाऱ्यांचीही चौकशी करण्यात येत होती. राम पाटील विद्यालयासमोरील चौकात प्रत्येक दुचाकी, चारचाकी वाहनांधारकांची कसून तपासणी करण्यात येत होती. औरंगाबादमध्ये लॉकडाऊनची कडक अंमलबजावणी करण्यात येत असल्याने विनाकारण घराबाहेर पडण्यास मज्जाव करण्यात येत आहे. त्यामुळे घराबाहेर पडणाऱ्यांनी दुचाकीवर मी दवाखान्यात जात आहे किंवा बँक कर्मचारी असं लिहिले फलक लावले होते. तरीही त्यांची पोलिसांकडून कसून चौकशी करून नोंदणी केली जात होती. यावरून औरंगाबादकरांनी जनता कर्फ्यूला चांगलाच प्रतिसाद दिल्याचं पहायला मिळत आहे…