ओझरच्या विघ्नहर मंदिरात चोरी,श्रींच्या मस्तकावरील सुवर्णलेपीत छत्रीची चोरी
ओझर येथील विघ्नहर मंदिरात सोमवारी मध्यरात्री चोरी झाली. श्रींच्या मस्तकावरील सुवर्णलेपीत छत्री आणि दानपेटी चोरट्यांनी पळवून नेल्याची घटना समोर आली आहे. ही घटना सीसीटीव्हीतही कैद झाली आहे.देशभरासह महाराष्ट्रातील लाखो भाविकांचे श्रद्धास्थान असलेल्या आणि अष्टविनायक तिर्थक्षेत्रांपैकी सर्वात श्रीमंत अशी ओळख असलेल्या ओझर येथील विघ्नहर मंदिरातून श्रींच्या मस्तकावरील सुवर्णलेपीत छत्री चोरट्यांनी चोरून नेली. मध्यरात्री २ च्या सुमारास ही घटना घडली.
याबाबत विघ्नहर गणपती देवस्थानचे विश्वस्त गणेश कवडे यांनी दिलेल्या माहितीनुसार, दोन चोरट्यांनी तोंड कपड्यात झाकले होते. ते सीसीटीव्हीमध्ये कैद झाले आहेत. साधारण दोन किलो वजनाच्या चांदीत घडवलेली सुवर्णलेपीत छत्री चोरट्यांनी चोरून नेली आहे. तर गाभाऱ्यात असलेल्या दोन दानपेट्यांपैकी एक दानपेटी फोडली. नंतर ही दानपेटी मंदिराजवळील नदीच्या परिसरात फेकून दिली. या प्रकरणी देवस्थान ट्रस्टच्या वतीने ओतूर पोलिसांत तक्रार दाखल करण्यात आली आहे.
एप्रिल महिन्यात तिजोरीतील रकमेची मोजदाद करण्यात आली होती. त्यानंतर लॅाकडाऊनमुळे मंदिर भाविकांसाठी दर्शनाकरिता बंद असल्याने दानपेटीत फारशी रक्कम नसावी, अशी शक्यता देवस्थान ट्रस्टचे अध्यक्ष बी. व्ही. मांडे यांनी व्यक्त केली. चोरीच्या घटनेची माहिती मिळताच जुन्नर पोलिस उपविभागीय अधिकारी दिपाली खन्ना, ओतूरचे सहाय्यक पोलिस निरीक्षक परशुराम कांबळे आणि पथकाने मंदिरात भेट देऊन परिसरातील पाहणी केली. मंदिराच्या भोवती असलेल्या दगडी कुंपणावरून चढून चोरट्यांनी मंदिरात प्रवेश केला असावा, अशी शक्यता कांबळे यांनी व्यक्त केली. दीड वर्षांपूर्वीदेखील या मंदिरात चोरीचा प्रयत्न चोरट्यांनी केला होता. सध्या कोरोना आपत्ती काळात मंदिर बंद असल्याने चोरट्यांनी चोरीचा धाडसी प्रयत्न केला असावा, असा पोलिसांचा कयास आहे.