इराणवरील हल्ला ट्रंप यांनी केवळ 10 मिनिटं आधी का रोखला?
पेट्रोलिंग करणारं अमेरिकेचं एक ड्रोन पाडल्यावरून इराण आणि अमेरिकेतील तणावात चांगलीच भर पडली असून दोन्ही देशांमधील तणाव दिवसेंदिवस वाढतच आहे. दोन्ही देशांमध्ये गेल्या काही काळापासून तणाव वाढीस लागला आहे. गेल्या आठवड्यात अमेरिकेनं ओमानच्या आखातामध्ये त्यांच्या युद्धनौका आणि लढाऊ विमानं तैनात केली होती.
या हल्ल्यात ईराणचे किती लोक मरतील, असं सैन्याला विचारलं आणि किमान दीडशे लोक मरतील, असं सैन्याकडून सांगण्यात आलं. त्यामुळे मानवरहित ड्रोन पाडल्याच्या बदल्यात दीडशे लोकांचा जीव घेणं योग्य नाही, असं सांगत हल्ल्याचा निर्णय कारवाईच्या 10 मिनिटे अगोदर रद्द केला अशी माहिती ट्रंप यांनी ट्विटरद्वारे दिली. याशिवाय न्यूयॉर्क टाइम्सने रात्री उशिरा प्रसिद्ध केलेल्या वृत्तामध्ये, इराणवर हल्ल्याची कारवाई अगदी सुरुवातीच्या टप्प्यात असतानाच ट्रंप यांनी लष्कराला थांबण्याचा निर्णय दिला असे म्हटले. सैन्य पूर्णपणे तयार आहे, सैन्य नवं आहे आणि प्रत्येक आव्हानासाठी तयार आहे, आपल्याला कोणतीही घाई नाही असं ट्रंप यांनी विधान केलं आहे.
होर्मुझ सामुद्रधुनीत आपल्या तेलवाहू जहाजावर इराणने हल्ला केल्याचा आरोप अमेरिकेने काही दिवसांपूर्वीच केला होता. यमनमधील हुती बंडखोरांना ईराणने पाठिंबा देणं अमेरिकेला पटलेलं नाही. दुसरं म्हणजे 1979 सालच्या ईराण क्रांतीवेळी 400 दिवस अमेरिकन दुतावासात अमेरिकन लोकांना ओलीस धरण्यात आलं होतं. त्यामुळे अमेरिका आणि ईराण हा वाद जुना आहे. जाणकारांच्या मते, ईराणला नियंत्रणात आणण्यासाठी डोनाल्ड ट्रम्प यांची धडपड सुरु आहे. कारण, एकेकाळी ईराणमध्ये सत्तापालट करणाऱ्या अमेरिकेलाच आता ईराणचं आव्हान निर्माण झालंय. आणखी एक कारण म्हणजे इस्रायललाही ईराण पटत नाही आणि इस्रायलचे अमेरिकेशी चांगले संबंध आहेत. इस्रायलचं धोरण अँटी ईराण असल्यामुळे अमेरिकेने ईराणला नियंत्रणात आणावं ही इस्रायलची इच्छा आहेच.
भारताला फटका – अमेरिकेच्या कारवाईनंतर भारतानेही ईराणकडून तेल आयात बंद करण्याचं जाहीर केलंय. पण ईराणसारखा सोपा पर्याय भारत कुठून शोधणार हा प्रश्न अजून अनुत्तरित आहे. ईराण आणि अमेरिका यांच्यात युद्ध झाल्यास भारतासह इतर देशांनाही मोठा फटका बसणार आहे.