हल्ली बायोपिकची क्रेझ आहे. त्यातूनही खेळाडूंच्या आयुष्यावर आधारित चित्रपटांना सकारात्मक प्रतिसाद मिळतो. सध्या अभिनेत्री परिणीती चोप्रा एका बायोपिकमध्ये काम करतेय. या चित्रपटात ती बॅडमिंटनपटू सायना नेहवालची भूमिका साकारतेय. या चित्रपटासाठी ती खूप मेहनत घेतेय. “या चित्रपटासाठी कितीही वेळ दिला तरीही तो कमीच आहे.” असं परिणीती म्हणाली.
या चित्रपटात आधी श्रद्धा कपूर काम करत होती. या चित्रपटासाठी श्रद्धानेही बॅडमिंटन कोर्टवर जाऊन खूप सराव केला होता. पण नंतर, व्यस्त वेळापत्रकामुळे या चित्रपटात ती काम करू शकली नाही. आता तीच भूमिका परिणीती साकारत आहे.
सहाय्यक दिग्दर्शक चरित देसाईसोबत परिणीती रिलेशनमध्ये आहे अशा अनेक चर्चा आहेत. यासंबंधी बोलताना ती म्हणाली की, “याविषयीच्या कोणत्याच बातमीला मी होकार दिलेला नाही किंवा नकारही दिलेला नाही. या चर्चांची सत्यता माझ्या कुटुंबाला आणि जवळच्या मित्रांना माहित आहे हीच माझ्यासाठी महत्त्वाची गोष्ट आहे. ही माझी वैयक्तिक गोष्ट आहे. त्याविषयी मी काहीही बोलू इच्छित नाही.”
खेळाडूची भूमिका करण्याची परिणीची खूप आधीपासून इच्छा होती. या चित्रपटाच्या निमित्ताने तिची इच्छा पूर्ण होणार आहे. सप्टेंबरमध्ये या चित्रपटाचे शूटिंग सुरु होणार असल्याचे सांगण्यात येत आहे.
