राज्यात मान्सूनची प्रतीक्षा लांबणार?, पाहा हवामान विभागाचा अंदाज

मोसमी पाऊस येत्या दोन दिवसांमध्ये मध्य भारताच्या काही भागांपर्यंत पोहोचेल, अशी शक्यता वर्तवण्यात येत आहे. राज्यात ७ ते १० जूनदरम्यान मान्सूनच्या पावसाचे आगमन होऊ शकते, असा अंदाज वर्तवण्यात आला आहे. मात्र चार आठवड्यांसाठी दिलेल्या पावसाच्या विस्तारित श्रेणीच्या अंदाजानुसार ९ जूनपर्यंत पश्चिम किनारपट्टीवर पाऊस फारसा सक्रिय असल्याचे स्पष्ट होत नाही. १० ते १६ जूनच्या आठवड्यात पश्चिम किनारपट्टीवर ही सक्रियता वाढलेली दिसते. यातही कोकण तसेच मध्य महाराष्ट्राचा काही भाग येथे मान्सून सक्रिय असल्याचे दिसत आहे. मराठवाडा आणि विदर्भामध्ये मान्सून जूनच्या दुसऱ्या पंधरवड्यात येऊ शकेल. या काळात कोकण वगळता उर्वरित महाराष्ट्रात फारशा जोरदार पावसाची शक्यता नाही, असेही या पूर्वानुमानामध्ये दिसत आहे.

राज्यात कोकण आणि मध्य महाराष्ट्रात तुरळक ठिकाणी मेघगर्जनेसह मान्सूनपूर्व पाऊस हजेरी लावण्याची शक्यता आहे. तर दुसरीकडे विदर्भात तुरळक ठिकाणी उष्णतेची लाट जाणवण्याची शक्यता आहे. रायगड, रत्नागिरी, सिंधुदुर्गमध्ये गडगडाटासह हलक्या सरींचे अनुमान आहे. मध्य महाराष्ट्रात कोल्हापूर, सातारा, सांगली, सोलापूर येथे शुक्रवारी, तसेच रविवार, सोमवारी अहमदनगर, पुणे, हिंगोली, नांदेड, लातूर, उस्मानाबाद येथे गडगडाटासह पावसाची शक्यता आहे. विदर्भामध्ये चंद्रपूर, गोंदिया, वर्धा येथे शुक्रवार आणि शनिवारी उष्णतेच्या लाटेचा इशारा देण्यात आला आहे. विदर्भात मान्सून आगमन होईपर्यंत तापमान चढे असण्याची शक्यता आहे.