“ज्याला घ्यायची आहे, तो कुठेही जाऊन घेणारच”, छगन भुजबळांनी केलं वाईन विक्रीचं समर्थन!
मुंबई |
राज्यात सुपर मार्केटमध्ये वाई विक्रीला परवानगी देण्यात आल्यानंतर राजकीय वातावरण चांगलंच तापलं आहे. भाजपाकडून या निर्णयावर तीव्र आक्षेप घेण्यात आला आहे. किरीट सोमय्या यांनी थेट संजय राऊत यांच्या कुटुंबीयांची वाईन व्यवसायात भागीदारी असल्याचा दावा केला आहे. त्यामुळे वाईन विक्रीचा हा निर्णय वादात सापडला असताना राज्याचे अन्न व पुरवठा मंत्री तसेच, नाशिक जिल्ह्याचे पालकमंत्री छगन भुजबळ यांनी वाईन विक्रीच्या निर्णयाचं समर्थन केलं आहे. ज्याला घ्यायची आहे, तो कुठेही जाऊन घेणारच, असं देखील म्हटलं आहे.
- साप साप करून भुई…
छगन भुजबळ यांनी नाशिकमध्ये बोलताना वाईन विक्री निर्णयाचं समर्थन करताना भाजपावर निशाणा साधला आहे. “मध्य प्रदेशात भाजपाचं सरकार आहे. तिथे मोठ्या प्रमाणावर मद्य घरात ठेवायला परवानगी दिली आहे. बार उघडायला परवानगी दिली आहे. आख्ख्या जगाने वाईनला हेल्थ फूड म्हणून मंजुरी दिली आहे. त्यात शेतकऱ्यांचा नक्कीच फायदा होईल. ज्याला घ्यायची आहे, तो कुठेही जाऊन घेणारच आहे. त्यामुळे उगीच साप साप म्हणून भुई थोपटण्याचं काम आहे. काहीतरी विषय काढून त्याच्यावर आंदोलन करायचं हे काही बरोबर आहे असं मला वाटत नाही”, असं भुजबळ म्हणाले आहेत.
- सोमय्यांचे राऊतांवर आरोप
वाईन विक्रीच्या निर्णयाचं समर्थन करणाऱ्या संजय राऊतांवर किरीट सोमय्यांनी आज सकाळी पत्रकार परिषद घेऊन गंभीर आरोप केले. “संजय राऊतांच्या कुटुंबीयांची अशोक गर्ग नावाच्या वाईन व्यवसायात भागीदारी आहे. त्यांच्या दोन्ही मुली या व्यवसायात संचालक आहेत”, असा आरोप किरीट सोमय्यांनी केला आहे.
- राऊतांचं सोमय्यांना प्रत्युत्तर
किरीट सोमय्यांच्या या आरोपांना संजय राऊतांनी देखील प्रत्युत्तर दिलं आहे. “अशोक गर्ग माझे मित्र आहेत. किरीट सोमय्यांची मुलं चणे-शेंगदाणे विकतात का? भाजपा नेत्यांची मुलं केळी विकतात का? अमित शाह यांचा मुलगा केळी, सफरचंद, ढोकळा विकतो का? कुणाची मुलं काय विकतात हा व्यक्तिगत प्रश्न आहे. देवेंद्र फडणवीस किंवा त्यांच्या पक्षातील नेत्यांची मुलं वांद्र्याच्या किंवा पेडर रोडच्या रस्त्यांवर स्टॉल टाकणार आहेत का? की डान्सबार टाकणार आहेत नाचवायला?” असा सवाल संजय राऊतांनी केला आहे.
