आम्हाला आज आश्चर्यकारक बहुमत मिळणार; दरेकरांचा दावा, भाजपने आणखी जुळवाजुळव केली?
मुंबई : राज्यात महाविकास आघाडी सरकार कोसळल्यानंतर एकनाथ शिंदे यांच्या नेतृत्वाखाली नव्याने स्थापन झालेल्या सरकारची आज विधिमंडळात बहुमत चाचणी होणार आहे. या चाचणीआधी भाजप नेते प्रवीण दरेकर यांनी शिवसेनेच्या गोटात खळबळ उडवून देणारा दावा केला आहे. ‘आमची कालच मोठी अग्निपरीक्षा होती आणि या परीक्षेत आम्ही पास झालो आहे. आजच्याही बहुमत चाचणीत आम्हाला आश्चर्यकारक बहुमत मिळणार आहे. शिंदे-फडणवीस सरकारवर आज आणखी काही आमदार विश्वास दाखवतील. काल विधानसभा अध्यक्षपदाच्या निवडणुकीत आम्हाला १६४ मते मिळाली होती. आजच्या चाचणीत ही मते निश्चितपणे आणखी वाढतील,’ असं प्रवीण दरेकर यांनी म्हटलं आहे.
एकनाथ शिंदे यांनी शिवसेना पक्षप्रमुख उद्धव ठाकरे यांना आव्हान देत बंडखोरी केल्यानंतर पक्षाचे ५५ पैकी ३९ आमदार शिंदे गटात सहभागी झाले. त्यातच काल विधिमंडळ सचिवालयाकडून एकनाथ शिंदे हेच शिवसेना विधिमंडळ पक्षाचे अधिकृत गटनेते असल्याची माहिती देण्यात आली आहे. त्यामुळे शिवसेनेच्या उर्वरित १६ आमदारांपैकी काही आमदार आज शिंदे सरकारच्या बाजूने मतदान करण्याची शक्यता वर्तवण्यात येत आहे. या पार्श्वभूमीवरच दरेकरांनी आमची मते वाढतील, असा दावा केल्याचं सांगितलं जात आहे.
‘महाराष्ट्रातील जनता नवं सरकार आल्याने समाधानी आणि आनंदी आहे. एक चांगलं सरकार जनेतला हवं होतं. अडीच वर्षांच्या काळात महाविकास आघाडी जनतेला समाधान देऊ शकली नाही,’ असं म्हणत प्रवीण दरेकर यांनी विरोधकांवर निशाणा साधला आहे.
शरद पवारांकडून मध्यावधीची शक्यता; काय म्हणाले दरेकर?
राज्यातील राजकीय स्थिती पाहता सहा महिन्यांत मध्यावधी निवडणुका होऊ शकतात, असा अंदाज राष्ट्रवादी काँग्रेसचे अध्यक्ष शरद पवार यांनी व्यक्त केला होता. यावर बोलताना दरेकर म्हणाले की, ‘पवारसाहेब जे बोलतात नेहमी त्याच्या उलट घटना घडत असतात. त्यामुळे सहा महिन्यांमध्ये मध्यावधी निवडणुका लागतील, असं शरद पवार हे म्हणाले असतील तर त्याचा अर्थ हे सरकार पुढील अनेक दशके चालेल,’ असा विश्वास दरेकरांनी व्यक्त केला.
