शिवसेना पक्षप्रमुख उद्धव ठाकरे, तसेच शिवसेना नेते आदित्य ठाकरे या दोघांना शह देण्यासाठी मुंबई महापालिकेत त्यांच्याकडून राबविल्या जाणाऱ्या प्रकल्पांना राज्य सरकारकडून प्रतिबंध लावण्याची शक्यता
मुंबईः शिवसेना विरुद्ध मुख्यमंत्री एकनाथ शिंदे, असा संघर्ष छेडला गेला असून शिवसेना पक्षप्रमुख उद्धव ठाकरे, तसेच शिवसेना नेते आदित्य ठाकरे या दोघांना शह देण्यासाठी मुंबई महापालिकेत त्यांच्याकडून राबविल्या जाणाऱ्या प्रकल्पांना राज्य सरकारकडून प्रतिबंध लावण्याची शक्यता वर्तवली जात आहे. २३ हजार कोटी रुपयांचा सांडपाणी प्रक्रिया प्रकल्प, तसेच खारे पाणी गोड करण्याचा प्रकल्प यांचा यात समावेश असू शकतो. विशेष म्हणजे, या दोन्ही प्रकल्पांना भाजपकडून जोरदार विरोध करण्यात आला होता.
आदित्य ठाकरे यांनी मुंबई पालिका आयुक्त इकबाल सिंह चहल यांना हाताशी धरून मुंबईमध्ये काही प्रकल्प राबवले होते. याला भाजपने विरोध केला होता. मात्र, मुख्यमंत्रिपदी उद्धव ठाकरे असल्याने भाजपच्या या विरोधात न जुमानता काही प्रकल्प राबवले जात होते. खारे पाणी गोड करण्याचा प्रकल्प, २३ हजार ४४७ कोटी रुपये खर्चाचे सात सांडपाणी प्रक्रिया प्रकल्प, माहुल पंपिग स्टेशनसाठी आदलाबदल केलेला भूखंड, वरळीतील अनावश्यक प्रकल्प आदींचा यात समावेश आहे.
आता राज्यात एकनाथ शिंदे गट आणि भाजप यांचे सरकार आले आहे. साहजिकच ठाकरे कुटुंबाला शह देण्यासाठी ज्या प्रकल्पांना भाजपने आधीपासूनच विरोध केला होता, संबंधित प्रकल्प व्यवहार्य नसल्याचे भाजपकडून सांगण्यात येत होते. अशा प्रकल्पांतील काही प्रकल्पांवर प्रतिबंध लावण्यात येईल, असे सांगण्यात येत आहे. त्यातही प्रामुख्याने सांडपाणी प्रक्रिया प्रकल्प असल्याचे समजते. या प्रकल्पामध्येच मध्यस्थी करणाऱ्या मुंबईतील एका बड्या व्यावसायिकावर सीबीआयचा छापा पडल्याचेही समजते.
