लोणावळा : लोणावळ्यात लहान मुलांचा वाढदिवस साजरा करण्यासाठी आलेल्या शिक्रापूर येथील एका कुटुंबावर मुलांच्या वाढदिवशीच दुःखाचा डोंगर कोसळला आहे. लोणावळ्यातील तुंगार्ली परिसरातील पुष्पा व्हिला येथील जलतरण तलावात बुडून २ वर्षांच्या जुळ्या मुलांपैकी एकाचा दुर्दैवी मृत्यू झाला आहे. या घटनेमुळे सर्वत्र हळहळ व्यक्त केली जात आहे.
शिवबा अखिल पवार (वय- २ वर्षे, रा. सध्या शिक्रापूर, शिरूर, मूळ रा. पाथर्डी, अहमदनगर) असं जलतरण तलावात बुडून मृत्यू झालेल्या बालकाचं नाव आहे.
मिळालेल्या माहितीनुसार ,अखिल पवार हे कुटुंबीयासह त्यांच्या दोन वर्षांच्या जुळ्या मुलांचा वाढदिवस साजरा करण्यासाठी १३ जुलै रोजी लोणावळ्यात आले होते. त्यासाठी त्यांनी लोणावळ्यातील तुंगार्लीतील गोल्ड व्हॅली येथील पुष्पा व्हिला बुक केले होते. येथे आल्यावर पवार कुटुंबीय व्हिलामधील हॉलमध्ये मुलांच्या वाढदिवसाची जय्यत तयारी करत होते. यावेळी शिवबा हा खेळता खेळता बाहेर आला आणि जवळच असलेल्या जलतरण तलावात पडून बुडाला.
काही वेळानंतर शिवबा जवळ कुठेच दिसत नाही म्हणून त्याच्या आई-वडील व नातेवाईकांनी शोधाशोध सुरू केली, पण तो आढळला नाही. अखेर कुटुंबातील सदस्य जलतरण तलावाजवळ आले असता, त्यांना शिवबा पाण्यात बुडाल्याचं लक्षात आलं. नातेवाईकांनी तत्काळ शिवबाला बाहेर काढले. पण तोपर्यंत त्याचा मृत्यू झाला होता.
दरम्यान, बुधवारी घडलेली ही घटना आज उघडकीस आली असून या घटनेबाबत लोणावळा शहर पोलीस ठाण्यात तक्रार दाखल करण्यात आली आहे. याप्रकरणी पुढील तपास लोणावळा शहर पोलीस करत आहे.
