पती-पत्नीच्या भांडणानंतर पत्नी पोलीस ठाण्यामध्ये तक्रार करण्यासाठी जात असल्याचा संशय आल्यामुळे पतीने पत्नीवर… पुढे जे घडलं ते भयानकच
परभणी: पती-पत्नीच्या भांडणानंतर पत्नी पोलीस ठाण्यामध्ये तक्रार करण्यासाठी जात असल्याचा संशय आल्यामुळे पतीने पत्नीवर विळ्याने सपासप वार करत तिला गंभीर जखमी केल्याची धक्कादायक घटना घडली. शुक्रवारी (१५ जुलै) जिंतूर तालुक्यातील चारठाणा येथील पेठ भागात ही घटना घडली. पत्नीची प्रकृती गंभीर असल्याने त्यांना पुढील उपचारासाठी नांदेड येथे हलवण्यात आले आहे. पत्नीच्या जबाबावरुन याप्रकरणी गुन्हा दाखल करण्याचं काम सुरु आहे.
असं काय झालं की थेट पत्नीवर विळ्याने वार केला?
चारठाणाच्या नारायण गवारे, पत्नी अनुसया गवारे यांच्यात १४ जुलैच्या रात्री कडाक्याचे भांडण झाले. त्यानंतर शुक्रवारी सकाळी पत्नी घराबाहेर पडली. पत्नी तक्रार नोंदविण्यासाठी पोलीस ठाण्यात जात असल्याचा संशय आल्याने पतीने तिचा पाठलाग केला. त्यानंतर तिला पेठ भागातील मुख्य रस्त्यावर गाठलं आणि त्यानंतर हातातील विळ्याने पत्नीवर सपासप वार करून तिला गंभीर जखमी केले. या घटनेत अनुसया गवारे (वय ४०) या गंभीर जखमी झाल्याने जमिनीवर कोसळल्या. दरम्यान, मदतीसाठी धाव घेणाऱ्या नागरिकांना नारायणने विळ्याचा धाक दाखवल्याने कुणीही मध्यस्थी केली नाही.
आरोपी पती पोलिसांच्या ताब्यात
पोलिसांना घटनेची माहिती मिळाल्याने सहाय्यक पोलीस निरिक्षक बालाजी गायकवाड, पोलीस उपनिरीक्षक विनोद साने, पोलीस हेड कॉन्स्टेबल सिध्दार्थ आचार्य, पोलीस नायक अजय रासकटला, पोलीस कॉन्स्टेबल पवन राऊत यांनी घटनास्थळी धाव घेतली. त्यानंतर नारायण गवारे याला पोलिसांनी ताब्यात घेतले.
गंभीर अवस्थेत रक्तबंबाळ झालेल्या अनुसया यांना खासगी वाहनाने उपचारासाठी जिंतूर येथील ग्रामीण रुग्णालयात हलविले. मात्र, महिलेची प्रकृती गंभीर बनल्याने तिला परभणी येथे हलविण्यात आले. या ठिकाणीही तिची प्रकृती चिंताजनक असल्याने परभणी येथून नांदेडला उपचारासाठी दाखल करण्यात आले आहे. पोलीस पुढील तपास करत आहेत.
