डॉक्टर सचिन देशमुख यांच्या बेडरुमचा दरवाजा तोडून आता प्रवेश करून त्यांच्या सात वर्षांच्या मुलाच्या गळ्याला चाकू लाऊन सुमारे सात लाखांचा ऐवज पळविला

याबाबत सुत्रांनी दिलेल्या माहितीनुसार, आखाडा बाळापूर येथील नवीन बसस्थानक परिसरात डॉ. सचिन देशमुख यांचा दवाखाना आहे. या दवाखान्याच्या वरच्या मजल्यावर डॉ. देशमुख हे कुटंबासह राहतात. आज पहाटे अडीच वाजण्याच्या सुमारास काही चोरटे एका स्कॉर्पिओ वाहनाने दवाखान्याजवळ आले. त्यांनी दवाखान्याच्या पाठीमागील ग्रील तोडून आत प्रवेश केला. त्यानंतर तेथे असलेल्या कर्मचारी विशाल होळगे याला मारहाण करण्यास सुरुवात केली. या मारहाणीत तो गंभीर जखमी होऊन खाली पडला.

त्यानंतर चोरट्यांनी दवाखान्याच्यावर असलेल्या डॉ. देशमुख यांच्या बेडरुमच्या दरवाज्यावर लाथ मारून दरवाजा तोडला. यावेळी डॉ. देशमुख कुटुंब जागे झाले. बेडरुमध्ये आलेल्या दोन चोरट्यांनी डॉ. देशमुख यांच्या सात वर्षाचा मुलगा श्रीयांश देशमुख याला ताब्यात घेऊन त्याच्या गळ्याला चाकू लावला. ‘तुम्हारे पास जो है वो जल्दी दो, वरणा बच्चे को मार डालेंगे’, अशी धमकी दिली. यामुळे घाबरलेल्या डॉ. देशमुख कुटुंबियांनी त्यांच्या जवळील सोन्याचे दागिने आणि रोख रक्कम चोरट्यांना दिली. तसेच, चोरट्यांनी कपाटात उचका उचक केली. मात्र, पोलिसांच्या वाहनाचं सायरन वाजल्याने चोरटे पसार झाले. त्यानंतर जखमी विशाल याला उपचारासाठी नांदेडला हलविण्यात आले आहे.

या घटनेची माहिती आखाडा बाळापूर पोलिसांना देण्यात आली. घटनास्थळी सहाय्यक पोलीस अधिक्षक यतीश देशमुख, उपनिरीक्षक शिवाजी बोंडले यांनी भेट दिली. श्वान पथकाला पाचारण करण्यात आले होते. मात्र, श्वान पथक जागेवरच घुटमळले. स्थानिक गुन्हे शाखेचे निरीक्षक उदय खंडेराय, सहाय्यक पोलास निरीक्षक राजेश मलपिल्लू यांच्या पथकाने भेट देऊन पाहणी केली आहे. याप्रकरणी गुन्हा दाखल करण्याची प्रक्रिया सुरु असल्याचे पोलिसांनी सांगितले.

आखाडा बाळापूर येथील साई नगर भागातील दोन ते तीन घरे फोडून चोरीचा प्रयत्न झाल्याचे गावकऱ्यांनी सांगितले. या घटनेमुळे आखाडा बाळापूरात एकच खळबळ उडाली आहे. या घटनेमध्ये नेमके चोरटे किती जण होते ते कोणत्या वाहनाने आले होते, याची खात्री पटलेली नाही. त्यामुळे बसस्थानक परिसरातील दुकानांच्या बाहेर असलेले सीसीटीव्ही फुटेज तपासणी करून चोरट्यांची ओळख पटविण्याचे प्रयत्न केले जाणार आहे.