कार्यालयीन वेळेत ऑफिसमध्ये सरकारी कर्मचाऱ्याला डुलकी लागली; वरिष्ठ अधिकाऱ्यांनी दिला दणका

इमामवाडा येथील राज्य कामगार विमा कार्यालयात वरिष्ठ सहायक असलेले सुदेश वासनिक हे १९ जुलै रोजी दुपारी ३.४० च्या सुमारास कार्यालयात खुर्चीवरच झोपलेले आढळले होते. राज्य कामगार विमा सोसायटीचे सदस्य संजय कटकमवार हे या कार्यालयात गेले असता त्यांना वासनिक खुर्चीवर झोपलेल्या स्थितीत दिसले. त्यांनी लगेच हा प्रकार वैद्यकीय प्रशासन अधिकारी डॉ. स. रा. नलगुंडवार यांच्या लक्षात आणून दिला. त्यामुळे डॉ. नलगुंडवार यांनी आता वासनिक यांना शिस्तभंगाची नोटीस बजावली आहे. समितीचे सदस्य कार्यालयात आले असताना आपण झोपलेले आढळले व त्यांनी त्या स्थितीत आपले छायाचित्रही काढले. या प्रकारामुळे कार्यालयाची प्रतिमा मलीन झाली आहे. कार्यालयीन वेळेत झोप घेऊन आपण कार्यालयीन शिस्तीचा भंग केला असल्याने आपल्याविरुद्ध कारवाई का करण्यात येऊ नये, अशी विचारणा या नोटिसद्वारे करण्यात आली आहे.

औषधीमुळे सुस्ती

ज्यांना ही नोटीस बजावण्यात आली त्या वासनिक यांच्याशी संपर्क साधला असता, प्रकृती अस्वास्थामुळे मी औषधी घेत आहे. दुपारी गोळी घ्यावी लागते. ती घेतल्यानंतर काही वेळ सुस्ती येते. आपण ज्यावेळी झोपलेलो दिसलो, त्यावेळी तशी सुस्ती आली होती. आज आपले वय ५२ वर्षांचे आहे. गेल्या अनेक वर्षांपासून या खात्यात आपण योग्य रीतीने काम करीत आहे. आपल्याला मिळालेल्या नोटीसला आपण उत्तर दिले असल्याचे वासनिक यांनी ‘मटा’ला सांगितले.

कार्यालयात खुर्चीवर झोपलेले कर्मचारी.