वर्ल्ड टेस्ट चॅम्पियनशिप जिंकण्यासाठी टीम इंडियाने सरावादरम्यान कॅमेऱ्यावर घातली बंदी!
WTC Final 2023 : भारतीय संघ इंग्लंडमध्ये होणाऱ्या वर्ल्ड टेस्ट चॅम्पियनशिपच्या फायनलच्या तयारीत व्यस्त आहे. खरंतर संघाला ओव्हलवर सराव करायचा होता, पण ओव्हलवर खेळपट्टी तयार करण्याचे काम सुरू होते, त्यामुळे संघाने अरुंडेल येथे २ जूनपर्यंत सराव केला आणि त्यानंतर लंडनला रवाना झाले. भारतीय संघ ४ ते ६ जून दरम्यान ओव्हलवर सराव करेल. यानंतर रोहित शर्माच्या नेतृत्वाखालील संघ ७ जूनपासून ऑस्ट्रेलियाविरुद्ध खऱ्या अर्थाने मैदानात उतरणार आहे.
लंडनला रवाना होण्यापूर्वी अरुंडेलमधील भारतीय संघाचा शेवटचा सराव अत्यंत महत्त्वाचा होता. संघाने सुमारे ६ तास सराव केला. हा ६ तासांचा सराव फायनलसाठी इतका महत्त्वाचा होता की मीडियालाही आत प्रवेश दिला गेला नाही. पत्रकार विमल कुमार यांच्या रिपोर्टनुसार, टीम इंडियाने गुप्त तयारी केली होती.
हेही वाचा – साताऱ्यात राष्ट्रवादीला मोठा धक्का! आमदार शशिकांत शिंदे यांच्या भावाचा शिवसेनेत प्रवेश
हा सराव इतका गुप्त ठेवण्यात आला होता की प्रसारमाध्यमांनाही तो पाहण्याची परवानगी नव्हती. फोटो क्लिक करण्याचीही परवानगी नव्हती. खरे तर प्रशिक्षक राहुल द्रविड यांनी फायनलबाबत खास रणनीती बनवली होती आणि त्यांना त्या रणनीतीची चाचपणी करायची होती. इतकेच काय फायनलमध्ये टीम इंडियाची प्लेइंग इलेव्हन कशी असेल याची झलकही तयारीत पाहायला मिळाली.
