IND vs ENG: लॉर्ड्सवर निर्णायक लढत; इंग्लंडने जिंकली नाणेफेक, भारतीय संघात ३ मोठे बदल!
IND vs ENG | भारत आणि इंग्लंड यांच्यातील तीन सामन्यांच्या वनडे मालिकेतील तिसरा आणि अत्यंत निर्णायक सामना आज ऐतिहासिक लॉर्ड्सच्या मैदानावर खेळवला जात आहे. या महामुकाबल्यात इंग्लंडने नाणेफेक (Toss) जिंकून प्रथम फलंदाजी करण्याचा निर्णय घेतला आहे. त्यामुळे भारतीय संघ प्रथम गोलंदाजी करण्यासाठी मैदानात उतरेल. तीन सामन्यांची ही मालिका सध्या १-१ अशी बरोबरीत असल्याने, आजचा सामना जिंकणारा संघ मालिकेवर ताबा मिळवणार आहे.
दुसऱ्या वनडे सामन्यादरम्यान रोहित शर्माचा लॉर्ड्सवरील हा अखेरचा सामना असेल, अशा स्वरूपाचे वृत्त समोर आले होते. मात्र, बीसीसीआयने (BCCI) सामन्यापूर्वीच या सर्व चर्चा फोल ठरवत रोहित शर्मा भारतासाठी खेळत राहणार असल्याचे स्पष्ट केले आहे. चालू मालिकेतील दोन्ही सामन्यांत रोहितला मोठी धावसंख्या उभारता आलेली नाही, त्यामुळे आजच्या निर्णायक सामन्यात त्याच्या कामगिरीकडे सर्वांचे विशेष लक्ष असणार आहे.
हेही वाचा
Facebook Down: जगभरात फेसबुक ठप्प! लॉग-इन करताना येतोय ‘हा’ मेसेज
भारतीय संघात ३ मोठे बदल; बुमराह दुखापतग्रस्त
या महत्त्वाच्या सामन्यासाठी भारतीय संघात तीन मोठे बदल करण्यात आले आहेत. वेगवान गोलंदाज जसप्रीत बुमराह गुडघ्याच्या दुखापतीमुळे या सामन्यासाठी उपलब्ध नसल्याची माहिती कर्णधार शुबमन गिलने दिली. या सामन्यात शिवम दुबे आणि वॉशिंग्टन सुंदर यांना विश्रांती देण्यात आली असून, त्यांच्या जागी प्रिन्स यादव आणि अर्शदीप सिंग यांचा प्लेईंग इलेव्हनमध्ये समावेश करण्यात आला आहे. तसेच, मधल्या फळीला बळकटी देण्यासाठी केएल राहुलचे संघात पुनरागमन झाले आहे.
दुसरीकडे, इंग्लंडच्या संघात केवळ एक बदल करण्यात आला असून, साकिब महमूदच्या जागी जोश टंगला अंतिम ११ खेळाडूंमध्ये संधी मिळाली आहे.
पहिला सामना भारताने तर दुसरा सामना इंग्लंडने जिंकला होता. लॉर्ड्सच्या ऐतिहासिक खेळपट्टीवर प्रथम फलंदाजी करणाऱ्या इंग्लंडला रोखण्याचे मोठे आव्हान आता भारतीय गोलंदाजांसमोर असेल.
अशी आहे भारताची प्लेईंग इलेव्हन
रोहित शर्मा, शुबमन गिल (कर्णधार), विराट कोहली, इशान किशन, श्रेयस अय्यर, केएल राहुल (यष्टीरक्षक), अक्षर पटेल, गुरनूर ब्रार, प्रिन्स यादव, अर्शदीप सिंग, प्रसीध कृष्णा.
महाईन्यूज-X वर फॉलो करा : महाईन्यूजला instagram वर फॉलो करा
