…तर आम्ही रस्त्यावर उतरू, महाराष्ट्र नवनिर्माण सेनेचा खासदार इम्तियाज जलील यांना इशारा
औरंगाबाद : महाविकास आघाडी सरकारने मंत्रिमंडळाच्या बैठकीत औरंगाबादच्या नामांतराचा प्रस्ताव मंजूर केल्यानंतर आता त्या विरोधात रस्त्यावर उतरु, असा इशारा खासदार इम्तियाज जलील यांनी दिला होता. जलील यांनी दिलेल्या इशाऱ्यानंतर आता मनसेने आक्रमक भूमिका घेतली आहे. तुम्ही रस्त्यावर आंदोलन करणार असाल तर या जिल्ह्यातील सर्व हिंदू बांधव आणि मनसे संभाजीनगरच्या नावासाठी रस्त्यावर उतरल्याशिवाय राहणार नाही, असा इशारा मनसेचे जिल्हाध्यक्ष सुमित खांबेकर यांनी खासदार इम्तियाज जलील यांना दिला आहे.
मनसेचे जिल्हाध्यक्ष सुमित खांबेकर यांनी याविषयी प्रतिक्रिया दिली. संभाजीनगर नावाविरोधात रस्त्यावर उतरू, असे वक्तव्य खासदार इम्तियाज जलील यांनी काल केले होते. जर असे झाले तर खासदारांविरोधात संभाजीनगर नावासाठी मनसे, सर्व राजकीय पक्ष आणि सर्व हिंदू बांधव रस्त्यावर उतरतील, असा इशारा खांबेकर यांनी दिला. केंद्र सरकार आता लवकरच औरंगाबाद शहराचे नाव संभाजीनगर करेल, असा विश्वास सुमित खांबेकर यांनी व्यक्त केला. त्याचप्रमाणे खासदार इम्तियाज जलील यांनी शरद पवार यांच्यासारख्या ज्येष्ठ नेत्यांवर बोलताना भान ठेवून बोलले पाहिजे, असा सल्ला देखील मनसेच्या वतीने देण्यात आला आहे. दरम्यान, औरंगाबाद शहराचे नाव संभाजीनगर करण्याच्या प्रस्तावाला महाविकास आघाडी सरकारने मंजुरी दिल्याने औरंगाबाद काँग्रेसमध्ये प्रचंड नाराजी आहे. काँग्रेसच्या शहर जिल्हाध्यक्षांसह २० ते २५ पदाधिकारी आणि २०० हून अधिक कार्यकर्त्यांनी राजीनामे दिले आहेत. आघाडी सरकारच्या निर्णयाचा निषेध करण्यात येत आहे.
