मुंबईत पुन्हा सेरो सर्वेक्षण ; १५ सप्टेंबर ते ६ ऑक्टोबर या कालावधीत पहिल्या फळीतील कर्मचाऱ्यांचे नमुने घेणार
मुंबई | करोना सध्या आटोक्यात असला तरी पालिकेने सेरो सर्वेक्षण करण्याचे ठरवले असून १५ सप्टेंबरपासून दुसऱ्या सेरो सर्वेक्षणाला सुरुवात झाली आहे. यामध्ये पहिल्या फळीत काम करणारे आरोग्य कर्मचारी, बेस्टचे कर्मचारी, सफाई कामगार यांच्या रक्ताचे नमुने घेतले जाणार आहेत.करोनाचा संसर्ग आटोक्यात आला असला आणि करोनाचा धोका कमी झालेला असला तरी पहिल्या फळीत काम करणाऱ्या कर्मचाऱ्यांच्या शरीरातील करोनाची प्रतिपिंडे कमी झाली आहेत का याचा शोध घेण्यासाठी पालिकेने सहावे सेरो सर्वेक्षण सुरू केले आहे. १५ सप्टेंबर ते ६ ऑक्टोबर या कालावधीत हे सर्वेक्षण करण्यात येणार आहे. पालिकेने गेल्या दोन वर्षात पाच सेरो सर्वेक्षणे पूर्ण केली आहेत. सहाव्या सेरो सर्वेक्षणातील दुसऱ्या टप्प्यातील सर्वेक्षण सुरू झाले आहे. दुसऱ्या टप्प्यात तीन हजारांहून अधिक नमुने ९३ ठिकाणांहून घेतले जाणार आहेत. त्यात रुग्णालये, वैद्यकीय अधिकारी, घन कचरा विभागातील कर्मचारी आणि बेस्टचे कर्मचारी यांचे नमुने घेतले जाणार आहेत.
आरोग्य विभागातील कर्मचारी तसेच विविध क्षेत्रातील पहिल्या फळीतील कर्मचारी आतापर्यंत पुन्हा बाधित झाले आहेत. याकाळात त्यांच्या शरीरातील प्रतिपिंडांची संख्या (ऍण्टीबॉडी) कमी झाली की वाढली आहे याचा अभ्यास करण्यासाठी हे सर्वेक्षण केले जाणार आहे. लशीच्या दोन्ही मात्रा घेतल्यानंतर आणि वर्धक मात्रा घेतल्यानंतरही प्रतिपिंडांची स्थिती काय आहे हे जाणून घेतले जाणार आहे.
पालिकेने मार्चमध्ये सहाव्या सेरो सर्वेक्षणाला सुरुवात केली होती. हे सहावे सेरो सर्वेक्षण तीन टप्प्यांत केले जाणार आहे. त्यात तीन हजार आरोग्यसेवा आणि आघाडीच्या कर्मचाऱ्यांचे रक्ताचे नमुने घेतले जाणार आहेत. पहिल्या टप्प्याला ६ महिने उलटले आहेत. आता १५ सप्टेंबरपासून दुसरा टप्पा सुरू झाला असून ६ ऑक्टोबरपर्यंत पालिका उपनगरीय आणि मोठ्या रुग्णालयांमधील वैद्यकीय कर्मचारी, डॉक्टर, परिचारिका, सफाई कामगार आणि बेस्ट कामगारांचे नमुने गोळा करणार आहे.
पालिकेने गेल्यावर्षी सप्टेंबर महिन्यात पाचवे सेरो सर्वेक्षण केले होते. त्यावेळी एकूण ८६.६४ टक्के नागरिकांमध्ये प्रतिपिंडांचे अस्तित्व दिसून आले होते. लसीकरण झालेल्या नागरिकांपैकी प्रतिपिंड विकसित झालेल्यांची संख्या ९०.२६ टक्के तर लसीकरण न झालेल्यांपैकी ७९.८६ टक्के नागरिकांमध्ये प्रतिपिंड आढळली होती. झोपडपट्टी तसेच बिगर झोपडपट्टी परिसरांमध्ये देखील प्रतिपिंड विकसित होण्याचे प्रमाण वाढले होते.