जून महिन्यात केवळ हजेरी लावून संपूर्ण महिना सुट्टी घेणाऱ्या पावसाने जुलै महिन्यात अजिबात ‘गैरहजर’ न राहता जुलैमधील १० वर्षांचे ‘रेकॉर्ड’ मोडीत काढले

जुलै महिन्यात पुणे शहरात सरासरी १८१ मिमी पाऊस पडतो. गेल्या काही वर्षांत जुलैमध्ये सरासरीपेक्षा जास्त पाऊस नोंदवला जात असल्याचे पुणे वेधशाळेच्या नोंदींवरून दिसून येते. २०१९मध्ये जुलैमध्ये ३७७ मिलिमीटर पाऊस पडला होता. २०२१मध्ये १९३, तर आता २०२२मध्ये ३७७.६ मिलिमीटर पावसाची नोंद करण्यात आली आहे.

जुलैमध्ये पहिल्या १५ दिवसांत जोरदार पाऊस झाला. एक ते १५ जुलै या कालावधीत संततधार सुरू असल्याने २८१ मिमी पावसाची नोंद झाली. त्यानंतर पावसाने काही काळ उघडीप दिली, तर अधूनमधून एका तासातच ४५ मिमी अधिक पाऊस झाला. १६ जुलैनंतर शुक्रवारपर्यंत जवळपास १०० मिमी पाऊस झाला.

शहर आणि परिसरात गेल्या बुधवारप्रमाणेच दुपारी चार वाजल्यानंतर जोरदार पाऊस झाला.

रात्री साडेआठपर्यंत .. मिमी पावसाची नोंद झाली.

पुढील दोन दिवसांत ढगांच्या गडगडाटासह पावसाचे संकेत पुणे वेधशाळेने दिले आहेत. पुणे आणि परिसरात सध्या मान्सूनसाठी पोषक स्थिती नसली, तरी स्थानिक वातावरणातील बदलांमुळे वादळी पाऊस हजेरी लावत आहे. दोनच दिवसांपूर्वी सुमारे तासभर जोरदार पाऊस झाला होता. त्यामुळे पाणी साचले होते. गुरुवारी दिवसभर पावसाने विश्रांती घेतली होती; पण रात्री उशिरा पावसाच्या मध्यम सरी पडल्या. शुक्रवारी दिवसभर उन्हाचा तडाखा होता. दुपारी चारच्या सुमारास काही जोरदार सरींनी हजेरी लावली. सुमारे अर्धा तास जोराचा पाऊस झाल्यानंतर त्याचा जोर कमी झाला. शिवाजीनगर, पाषाणपेक्षा शहराच्या पूर्व भागांत पावसाचा जोर अधिक होता. मगरपट्टा परिसरात सायंकाळी साडेपाचपर्यंत ३२.५ मिमी पावसाची नोंद झाली होती.

पुढील दोन दिवसांत आकाश अंशतः ढगाळ राहण्याची शक्यता असून, दुपारनंतर ढगांच्या गडगडाटासह पाऊस होण्याचा अंदाज आहे.

गेल्या दहा वर्षांमध्ये जुलै महिन्यात झालेला पाऊस

वर्ष पाऊस (मिमी)

२०१३ १९१.९

२०१४ २८२.४

२०१५ ६२.०

२०१६ २२३.३

२०१७ १९४.२

२०१८ १७६

२०१९ ३७७

२०२० १२०

२०२१ १९३

२०२२ ३७७.६