ठाकरे गटाच्या पाच माजी नगरसेवकांचा भाजपात प्रवेश होताच त्यांच्या विरोधात पुण्यात लागले फ्लेक्स
पुणे : आगामी पुणे महानगरपालिका निवडणुकीच्या पार्श्वभूमीवर ठाकरे गटाचे माजी नगरसेवक विशाल धनवडे, पल्लवी जावळे, बाळा ओसवाल, प्राची अल्हाट, संगीता ठोसर या पाच माजी नगरसेवकांनी पक्षाला सोडचिठ्ठी देत, भाजप प्रभारी प्रदेशाध्यक्ष रवींद्र चव्हाण, हवाई राज्यमंत्री मुरलीधर मोहोळ, आमदार सुनील कांबळे यांच्या प्रमुख उपस्थितीत मुंबईत भाजपमध्ये प्रवेश केला.
ठाकरे गटाच्या या पाच माजी नगरसेवकांनी भाजपमध्ये प्रवेश करताच, पुणे शहरातील भाजपच्या पदाधिकारी, कार्यकर्त्यांमध्ये मोठया प्रमाणावर नाराजी पाहण्यास मिळत आहे. तर या पक्ष प्रवेशावरुन भाजपचे पदाधिकारी विशाल दरेकर यांनी नरपतगिरी चौकात एक फ्लेक्स लावला आहे. या फ्लेक्सवर ‘पक्ष प्रवेश दुश्मनी जम कर करो, दुश्मनी जम कर करो, लेकीन यह ऐहसास रहे, जब कभ हम दोस्त बन जाये तो शरमिंदा ना हो… श्री. विशाल दरेकर अशा आशयाचे मजकूर असलेला फ्लेक्स लावण्यात आला आहे. या फ्लेक्सबाजीची शहरातील राजकीय वर्तुळात एकच चर्चा रंगू रंगली आहे.
हेही वाचा – PCMC | मालमत्ता कर थकबाकीदार हॉटेल, मॉल, पेट्रोल पंप, मंगल कार्यालये, कंपन्या महापालिकेच्या रडारवर!
या फ्लेक्सबाजी बाबत विशाल दरेकर यांच्याशी संवाद साधला असता ते म्हणाले की, प्रवेश केलेल्या पाच माजी नगरसेवकांनी मागील पाच वर्षाच्या कालावधीत भाजपच्या वरिष्ठ नेत्यांवर केवळ टीका करण्याचं काम त्यांनी केलं आहे. आता राज्यामध्ये भाजपला मिळालेल्या यशानंतर केवळ आपली घरे वाचवण्यासाठी त्यांनी पक्ष प्रवेश केला आहे. आम्ही स्थानिक पातळीवर काम करत असताना अनेकदा विरोधाची भूमिका घेण्यात आली. यांनी पूर्ण केलेली ५ कामे देखील हे सांगू शकत नाहीत, अशी भूमिका मांडत त्यांनी नाराजी व्यक्त केली.
