पुणे, पिंपरी-चिंचवड विषारी दारू प्रकरण: उपमुख्यमंत्री सुनेत्रा अजित पवार यांचे सखोल चौकशीचे आदेश

पिंपरी-चिंचवड | पुणे शहरातील हडपसर आणि पिंपरी-चिंचवडमधील दापोडी-फुगेवाडी परिसरात विषारी दारू प्यायल्याने १२ नागरिकांचा मृत्यू झाल्याची घटना अत्यंत दुर्दैवी आणि संतापजनक आहे. या प्रकरणातील दोषींची कोणत्याही परिस्थितीत गय केली जाणार नाही, असे उपमुख्यमंत्री सुनेत्रा अजित पवार यांनी स्पष्ट केले आहे. या संपूर्ण प्रकरणाच्या मुळाशी जाऊन सखोल आणि कडक चौकशी करण्याचे स्पष्ट आदेश त्यांनी प्रशासनाला दिले आहेत. निरपराध नागरिकांचा बळी घेणाऱ्या या बेकायदेशीर धंद्यांवर कठोर कारवाई करण्यासाठी सरकार कटिबद्ध असल्याचे त्यांनी सांगितले.

या भीषण घटनेची गंभीर दखल घेत उपमुख्यमंत्री सुनेत्रा पवार यांनी तातडीने पुणे व पिंपरी-चिंचवडचे पोलीस आयुक्त, राज्य उत्पादन शुल्क (एक्साईज) विभागाचे वरिष्ठ अधिकारी आणि स्थानिक प्रशासनाशी थेट संपर्क साधला. या दुर्घटनेच्या मुळाशी जाऊन सखोल तपास करा आणि अशा बेकायदेशीर कृत्यांमध्ये किंवा अवैध दारूच्या धंद्यांमध्ये सहभागी असलेल्या लहान-मोठ्या सर्वच घटकांवर कठोर कायदेशीर कारवाई करावी, अशा कडक सूचना त्यांनी अधिकाऱ्यांना दिल्या आहेत. तसेच भविष्यात अशा घटना रोखण्यासाठी अवैध हातभट्ट्यांवर तात्काळ कारवाई करण्याची गरजही त्यांनी व्यक्त केली.

हेही वाचा

महाविकास आघाडीचा विधानपरिषद निवडणुकीचा जागावाटप फॉर्म्युला ठरला! १७ पैकी १५ जागांवर एकमत

या प्रकरणाच्या तपासाबाबत पुढे माहिती देताना उपमुख्यमंत्री सुनेत्रा पवार यांनी सांगितले की, आतापर्यंत या संपूर्ण प्रकरणात ८ जणांना पोलिसांनी अटक केली आहे. पोलीस प्रशासन आणि राज्य उत्पादन शुल्क विभागाकडून अत्यंत वेगाने आणि संयुक्तपणे या प्रकरणाचा तपास सुरू आहे. ही विषारी दारू नेमकी कोठून तयार झाली, त्याचा मुख्य पुरवठा कोठून झाला आणि या काळ्या धंद्यामागे आणखी कोणाचा सहभाग आहे, याचा शोध घेण्यासाठी तपास यंत्रणा कामाला लागल्या आहेत. या प्रकरणातील मुख्य सूत्रधारांना कठोर शिक्षा सुनावण्यासाठी सर्व आवश्यक पुरावे गोळा करण्याचे आदेशही त्यांनी दिले आहेत.

महाईन्यूज-X वर फॉलो करा : महाईन्यूजला instagram वर फॉलो करा