मुंबई : शाळेची फी न भरल्यामुळे मुलाला चार महिने ठेवले वर्गाबाहेर, तिघांविरुद्ध गुन्हा दाखल
मुंबई : मुंबईतील एका इंग्रजी माध्यमाच्या शाळेत एक अमानुष प्रकार समोर आला आहे. शुल्क न भरल्यामुळे एका 12 वर्षीय विद्यार्थ्याला चार महिने वर्गाबाहेर बसवल्याचा आरोप आहे. याप्रकरणी शाळाप्रमुख आणि दोन शिक्षकांविरुद्ध गुन्हा दाखल करण्यात आला आहे. 7,500 रुपये थकीत फी जमा न केल्याने इयत्ता आठवीच्या विद्यार्थ्याला चार महिन्यांपासून वर्गाबाहेर जमिनीवर बसवल्याचा आरोप आहे.
पीडित विद्यार्थ्याच्या आईच्या तक्रारीच्या आधारे एफआयआर दाखल करण्यात आला आहे. एफआयआरमध्ये विद्यार्थ्याच्या आईने आरोप केला आहे की, शाळेच्या प्रशासनाने तिच्या मुलाचा मानसिक आणि शारीरिक छळ केला. त्याच शाळेत इयत्ता दुसरीत शिकणाऱ्या आपल्या दुसऱ्या मुलाचाही शाळेची फी न भरल्याने अपमानित केल्याचा आरोप त्यांनी केला.
पती टीबीने ग्रस्त
पोलिसांत दाखल केलेल्या तक्रारीनुसार, ही महिला तिचा पती, सासरे आणि 13, 12, 11 आणि 6 वर्षे वयाच्या चार मुलांसोबत राहते. यातील तीन मुले सरकारने मान्यता दिलेल्या इंग्रजी माध्यमाच्या शाळेत शिकतात. या महिलेने सांगितले की, ती नियमितपणे मुलांची फी जमा करत होती. मात्र, गेल्या काही काळापासून त्यांचे कुटुंब आर्थिक संकटात सापडले आहे. वास्तविक महिलेच्या पतीला टीबी आहे. आणि त्यामुळे तो कामावर जाऊ शकत नाही.
त्यांच्याविरुद्ध गुन्हा दाखल केला
महिलेने सांगितले की, तिचा मुलगा अनेकदा शाळेत अपमान सहन करत रडत घरी परतायचा. जानेवारीत झालेल्या युनिट टेस्टमध्येही मुलांना बसण्याची परवानगी नव्हती. बाल न्याय कायदा, 2000 च्या कलम 23 (मुलाशी क्रूरता) अंतर्गत दोन शिक्षक आणि शाळेच्या अधिकाऱ्याविरुद्ध गुन्हा दाखल करण्यात आला आहे, असे पोलीस अधिकाऱ्याने सांगितले.
