स्थैर्य, विकास आणि विश्वासाची वाटचाल हाच संकल्प : शहराध्यक्ष शत्रुघ्न काटे

पिंपरी-चिंचवड :  नवनिर्वाचित महापौर रवी लांडगे आणि उपमहापौर शर्मिला बाबर यांच्या बिनविरोध निवडीनंतर पिंपरी चिंचवड शहरात स्थैर्य आणि विकासाचा नवा अध्याय सुरू झाला असून, भाजपाच्या सक्षम नेतृत्वामुळे शहराचा सर्वांगीण विकास अधिक वेगाने साध्य होईल, असा ठाम विश्वास भाजपा शहराध्यक्ष तथा ज्येष्ठ नगरसेवक शत्रुघ्न काटे यांनी व्यक्त केला.

दीर्घकाळ चाललेल्या प्रशासकीय राजवटीनंतर लोकनियुक्त प्रतिनिधींच्या हाती पुन्हा शहराचा कारभार येणे ही नागरिकांसाठी दिलासादायक बाब असल्याचे काटे यांनी सांगितले. सभागृहाचे कामकाज शिस्तबद्ध, पारदर्शक आणि लोकाभिमुख राहील, यासाठी भाजपा कटिबद्ध आहे, असेही त्यांनी स्पष्ट केले. पिंपरी चिंचवडच्या औद्योगिक, आयटी, मेट्रो, शिक्षण आणि पायाभूत सुविधांच्या विकासाला अधिक गती देत नागरिकांच्या दैनंदिन जीवनाशी निगडित प्रश्न प्राधान्याने सोडवले जातील, असा विश्वास त्यांनी व्यक्त केला.

शहराध्यक्ष शत्रुघ्न काटे म्हणाले, “पिंपरी चिंचवड हे राज्यातीलच नव्हे तर देशातील एक आदर्श शहर म्हणून ओळखले जाते. नियोजनबद्ध विकास, सक्षम प्रशासन आणि लोकाभिमुख धोरणे यामुळे हे शहर सातत्याने पुढे जात आहे. महापौर व उपमहापौर यांच्या नेतृत्वाखाली सभागृहाचे कामकाज अधिक शिस्तबद्ध, पारदर्शक आणि प्रभावी होईल.” “नागरिकांनी भाजपावर दाखवलेला विश्वास ही आमची जबाबदारी आहे. हा विश्वास सार्थ ठरवण्यासाठी महापौर, उपमहापौर, लोकप्रतिनिधी आणि संघटना एकसंघपणे काम करेल. पिंपरी चिंचवडचा विकास हा केवळ आश्वासन न राहता प्रत्यक्ष अनुभव ठरेल, असेही काटे म्हणाले.

“नागरिकांनी आम्हांवर दाखवलेला विश्वास हा आमच्या नेतृत्वाची खरी जबाबदारी आहे. महापौर रवी लांडगे आणि उपमहापौर शर्मिला बाबर यांच्या नेतृत्वाखाली महापालिकेचे कामकाज पूर्णपणे शिस्तबद्ध, पारदर्शक आणि लोकाभिमुख राहील. प्रत्येक निर्णय, प्रत्येक प्रकल्प आणि प्रत्येक सेवा नागरिकांच्या हिताला केंद्रस्थानी ठेवूनच घेण्यात येईल. पिंपरी चिंचवडचा विकास केवळ औद्योगिक किंवा आर्थिक प्रगतीपुरता मर्यादित राहणार नाही; प्रत्येक प्रभाग, प्रत्येक वस्ती आणि प्रत्येक नागरिक विकासाचा प्रत्यक्ष लाभ अनुभवेल. मतभेद असले तरी सभागृहातील सहकार्य आणि सहमती शहराच्या प्रगतीसाठी बाधक ठरणार नाही, आणि हे नेतृत्व आपल्या महानगराला आधुनिक, सुरक्षित आणि विकासशील शहर बनवण्यासाठी कटिबद्ध आहे.”
– शत्रुघ्न काटे, शहराध्यक्ष तथा नगरसेवक, भाजपा, पिंपरी-चिंचवड.