अजिंक्य माचुत्रे याला ग्रिकोरोमन महाराष्ट्र केसरी स्पर्धेत कांस्यपदक
क्रीडा विश्व : कांस्यपदक पटकावत अजिंक्यची दमदार कामगिरी
पिंपरी-चिंचवड : देवळी, जि. वर्धा येथे दिनांक ३१ एप्रिल व १ मार्च २०२६ रोजी पार पडलेल्या दुसऱ्या ग्रिकोरोमन वरिष्ठ गट महाराष्ट्र केसरी कुस्ती स्पर्धेत पिंपरी-चिंचवडच्या अजिंक्य माचुत्रे याने उल्लेखनीय कामगिरी करत कांस्यपदक पटकावले.
स्पर्धेतील पहिल्या फेरीत अजिंक्यने धाराशिवच्या प्रतिस्पर्ध्यावर ८-० असा एकतर्फी विजय मिळवला. दुसऱ्या फेरीत पुणे शहरच्या मल्लाविरुद्ध चितपट करत विजय मिळवून पुढील फेरीत प्रवेश केला. तिसऱ्या फेरीत पुणे जिल्ह्याच्या खेळाडूविरुद्ध ४-५ गुणांनी पराभव झाला. मात्र रिपेच फेरीत अजिंक्यने दमदार पुनरागमन करत कांस्यपदकासाठी झालेल्या लढतीत जळगाव जिल्ह्याच्या मल्लावर ८-० असा दणदणीत विजय मिळवत तृतीय क्रमांक पटकावला.
अजिंक्यच्या या यशाबद्दल पिंपरी चिंचवड कुस्तीगीर संघाचे अध्यक्ष हनुमंत गावडे, कार्याध्यक्ष विशाल कलाटे, भारत केसरी विजय गावडे, सरचिटणीस संतोष माचुत्रे तसेच इतर पदाधिकारी व कुस्तीप्रेमींनी त्याचे अभिनंदन केले.
अजिंक्य सध्या रहाटणी येथील काळभैरवनाथ तालीममध्ये पैलवान किशोर नखाते आणि अजय लांडगे यांच्या मार्गदर्शनाखाली सराव करत असून त्याच्या या यशामुळे परिसरात आनंदाचे वातावरण निर्माण झाले आहे.
