राष्ट्रवादी अजूनही आशावादी, मलिक व देशमुखांची मतदानासाठी सुप्रीम कोर्टात धाव
मुंबई: महाराष्ट्राच्या विधानपरिषदेतील १० जागांच्या निवडणुकीसाठी आज मतदान होत आहे. भाजपनं या निवडणुकीत ५ जणांना उमेदवारी दिली आहे. प्रविण दरेकर, राम शिंदे, उमा खापरे, श्रीकांत भारतीय, प्रसाद लाड विधानपरिषद निवडणूक लढवत आहेत. तर शिवसेनेनं सचिन अहिर, आमश्या पाडवी, राष्ट्रवादी काँग्रेसनं रामराजे नाईक निंबाळकर, एकनाथ खडसे, काँग्रेसकडून भाई जगताप आणि चंद्रकांत हंडोरे यांना उमेदवारी दिली आहे. विधानपरिषदेच्या १० जागांसाठी ११ उमेदवार निवडणुकीच्या रिंगणात आहेत. यामुळं विधानपरिषदेसाठी एका मताला देखील महत्त्व प्राप्त झालं आहे. राष्ट्रवादी काँग्रेसचे मंत्री नवाब मलिक आणि अनिल देशमुख यांना मतदान करण्यास परवानगी देण्यास मुंबई हायकोर्टानं नकार दिला होता. आता नवाब मलिक आणि अनिल देशमुख यांनी सुप्रीम कोर्टात धाव घेतल्याची माहिती आहे.
अनिल देशमुख, नवाब मलिकांची सुप्रीम कोर्टात धाव
अनिल देशमुख सध्या मनी लाँड्रिंग प्रकरणाच्या आरोपामुळं सध्या ईडीच्या कोठडीत आहेत. तर, मंत्री नवाब मलिक हे देखील ईडी कोठडीत आहेत. नवाब मलिक आणि अनिल देशमुख यांची याचिका सर्वोच्च न्यायालयात एका खंडपीठापुढं तातडीनं सुनावणी करण्यासाठी सादर करण्यात आली. मात्र, त्या खंडपीठानं या याचिकेवर सरन्यायाधीशांच्यापुढं सुनावणी व्हावी, असं मत मांडलं.
सुप्रीम कोर्टात दुपारनंतर सुनावणी
अनिल देशमुख आणि नवाब मलिक यांच्या अर्जावर आज दुपारी २ वाजता सुनावणी होऊ शकते. नवाब मलिक आणि अनिल देशमुख यांच्या बाजूनं निकाल लागला तरी पुढील प्रक्रिया पूर्ण होऊन ते ४ वाजेपर्यंत नवाब मलिक आणि अनिल देशमुख मतदानाला पोहोचतील की नाही याबद्दल साशंकता आहे.
राष्ट्रवादीच्या आशा कायम
राष्ट्रवादी काँग्रेसनं विधान परिषदेसाठी रामराजे नाईक निंबाळकर आणि एकनाथ खडसे यांना उमेदवारी दिली आहे. राष्ट्रवादीकडं विधानसभेतील संख्याबळ ५३ आहे. मात्र, नवाब मलिक आणि अनिल देशमुख यांना मुंबई हायकोर्टानं परवानगी नाकारल्यानं राष्ट्रवादीकडे ५१ आमदारांचं संख्याबळ राहते. त्यामुळं नवाब मलिक आणि अनिल देशमुख यांना मतदानासाठी परवानगी मिळावी म्हणून प्रयत्न करण्यात येत आहेत.
