TMKOCच्या निर्मात्यांवर मराठी अभिनेत्रीचा संताप
भाजीवाली सुनीताची भूमिका साकारणाऱ्या प्राजक्ता शिसोडेनं मालिका सोडली
मुंबई : ‘तारक मेहता का उल्टा चष्मा ‘ ही मालिका पुन्हा चर्चेत आली असून ती वादाच्या भोवऱ्यात सापडली आहे. या मालिकेमध्ये भाजीवाली सुनीताची भूमिका साकारणाऱ्या प्राजक्ता शिसोडेनं ही मालिका सोडली. सोशल मीडियावर संतप्त पोस्ट शेअर करत तिनं ही मालिका सोडल्याचं सांगितलं. या पोस्टमध्ये ‘जिथे माझा अनादर केला जातो आणि मला चुकीची वागणूक दिली जाते, तिथे मी काम करू शकत नाही’ असं प्राजक्ताने लिहिलं. अशातच आता प्राजक्तावर ‘तारक मेहता का उल्टा चष्मा’ या मालिकेच्या टीमकडून दबाव टाकण्यात येतोय. याबद्दल अभिनेत्रीनं सोशल मीडियावर पोस्ट शेअर केली आहे.
प्राजक्ता शिसोडेनं इन्स्टाग्रामवर पोस्ट शेअर करत लिहिलं की, ‘‘तारक मेहता..’च्या टीमकडून सोशल मीडियावरून पोस्ट डिलिट करण्यासाठी माझ्यावर सतत दबाव टाकला जात आहे. इतकंच नव्हे तर ते सतत माझं सोशल मीडिया अकाऊंट तपासत आहेत की, मी पोस्ट डिलिट केली की नाही?’
हेही वाचा : मिशन- PCMC: भाजपाकडे अर्ज जमा करून निशा यादव निवडणूक रणांगणात!
प्राजक्तानं मराठी अभिनेत्रींना केली विनंती
मराठी अभिनेत्रींना विनंती करत प्राजक्ता म्हणाली की, ‘मी इतर मराठी अभिनेत्रींना विनंती करते की, त्यांनी ‘तारक मेहता..’ मध्ये सुनीताची भूमिका करू नये. कारण ती भूमिका मालिकेसाठी महत्त्वाची नाही, असा विचार ते करतात. (हा माझा अनुभव आहे.) आपण नोकर किंवा भाजीवालीची भूमिका साकारण्यासाठी जन्माला आलो नाही.’ पुढे, प्राजक्ताने ‘मनापासून काम करत होती मी, एका मराठी मुलीला दुखावलं तुम्ही. असो….देव तुमचं भलं करो.’ असं कॅप्शन लिहिलं आहे.
दरम्यान, प्राजक्ताने ‘तारक मेहता का उल्टा चष्मा’ ही मालिका सोडण्यामागचं कारण सांगत सोशल मीडियावर पोस्ट शेअर करत लिहिलेलं की, ‘तुम्ही अशा लोकांसोबत काम करू नये जे तुमच्या भावनांचा आदर करत नाहीत आणि तुमचा स्वाभिमान जपत नाहीत. ‘तारक मेहता का उल्टा चष्मा’ मधील सुनीताच्या या भूमिकेसाठी धन्यवाद. मला माझ्या महिला मंडळाच्या टीमची आठवण येईल.’
