मुंबई-पुण्यात येत्या 24 तासात मुसळधार पाऊस, महाराष्ट्रातील 24 जिल्ह्यांमध्ये ऑरेंज-यलो अलर्ट जारी

मुंबई : महाराष्ट्रात जुलै महिन्याचा पंधरवडा उलटून गेला असून, अनेक जिल्ह्यांत मुसळधार पावसाच्या बातम्या येत आहेत. पुढील ५ दिवस राज्यात मुसळधार पावसाचा इशारा हवामान खात्याने दिला आहे. हवामान खात्याच्या अंदाजानुसार मुंबई, पालघर, पुणे, कोकण, मराठवाडा आणि विदर्भात चांगला पाऊस पडेल. हवामान खात्याने अनेक जिल्ह्यांमध्ये पावसासाठी ऑरेंज आणि यलो अलर्ट जारी केला आहे.

हवामान खात्याने दिलेल्या माहितीनुसार, मुंबई, ठाणे, नवी मुंबईत पावसाचा वेग वाढणार आहे. गडचिरोली, चंद्रपूर आणि आजूबाजूच्या काही भागात मध्यम ते मुसळधार ढग असून, पुढील २४ तासांत जोरदार पावसाची शक्यता आहे. दरम्यान, पुढील 2 दिवस मध्य भारताच्या काही भागात मुसळधार ते अति मुसळधार पावसाचा अंदाज आहे. कोकण, सातारा, पुणे, नाशिक येथील घाट परिसरात मुसळधार पाऊस पडेल. मराठवाड्यात काही ठिकाणी मध्यम ते जोरदार पावसाची शक्यता आहे.

महाराष्ट्रातील कोणत्या भागात मुसळधार पाऊस?
हवामान खात्याने दिलेल्या माहितीनुसार, आज मुंबई, ठाणे, रायगड, रत्नागिरी, सातारा, सिंधुदुर्ग, कोल्हापूर, धुळे, जळगाव, औरंगाबाद, जालना, बुलढाणा, अकोला, अमरावती, वर्धा, या भागात पावसाचा यलो अलर्ट जारी करण्यात आला आहे. वाशिम, नागपूर, भंडारा, गोंदिया, पालघर, पुणे, यवतमाळ, चंद्रपूर, गडचिरोली या जिल्ह्यांमध्ये पावसाचा ऑरेंज अलर्ट जारी करण्यात आला आहे, तर महाराष्ट्राच्या इतर भागांमध्ये हवामान खात्याने सूचित केले आहे.

राज्यात मुसळधार पाऊस पडणार आहे
भारतीय हवामान खात्याने पुढील ४ ते ५ दिवस राज्यात मुसळधार पावसाचा इशारा दिला आहे. सध्या पश्चिम महाराष्ट्र, कोकण, उत्तर महाराष्ट्र, विदर्भात पावसाची संततधार सुरू आहे. कोकणात यलो अलर्ट जारी करण्यात आला आहे. रत्नागिरी, सिंधुदुर्गात मुसळधार पावसाची शक्यता हवामान खात्याने व्यक्त केली आहे. आज हवामान खात्याने मध्य महाराष्ट्र, मराठवाडा, विदर्भासह कोकणासाठी यलो अलर्ट जारी केला आहे. त्यामुळे आज राज्यात वादळी पाऊस पडणार आहे.