Davos 2026 : ट्रम्प यांच्या WEF रिसेप्शनसाठी सात भारतीय उद्योगप्रमुखांना निमंत्रण; कोण आहेत वाचा!
जागतिक आर्थिक अनिश्चिततेच्या पार्श्वभूमीवर भारतीय उद्योगजगताचे डावोसमध्ये वाढते महत्त्व
डावोस (स्वित्झर्लंड) | वर्ल्ड इकॉनॉमिक फोरम (WEF) च्या वार्षिक परिषदेत यंदा अमेरिकेचे राष्ट्राध्यक्ष डोनाल्ड ट्रम्प यांच्या उपस्थितीने विशेष लक्ष वेधले आहे. ट्रम्प यांच्या भाषणानंतर होणाऱ्या विशेष रिसेप्शनसाठी भारतातील सात नामांकित उद्योगसमूहांच्या प्रमुखांना निमंत्रण देण्यात आले आहे.
सहा वर्षांनंतर प्रथमच डोनाल्ड ट्रम्प डावोस परिषदेत सहभागी होत असून, त्यांच्या उपस्थितीमुळे जागतिक राजकीय आणि आर्थिक वर्तुळात मोठी उत्सुकता निर्माण झाली आहे. वाढती जागतिक अनिश्चितता, अमेरिका लादत असलेले शुल्क (टॅरिफ) आणि ग्रीनलँड संदर्भातील ट्रम्प यांच्या अलीकडील वक्तव्यांमुळे ही परिषद अधिकच चर्चेत आहे.
हेही वाचा : चिंचवडमधील ७७ वर्षीय ज्येष्ठ नागरिकाची १ कोटींची सायबर फसवणूक
ट्रम्प यांच्या रिसेप्शनसाठी निमंत्रित भारतीय CEOs ट्रम्प यांच्या विशेष रिसेप्शनसाठी खालील भारतीय उद्योगप्रमुखांना निमंत्रण देण्यात आले आहे :
1. अनिश शाह – ग्रुप चीफ एक्झिक्युटिव्ह, महिंद्रा समूह
2. एन. चंद्रशेखरन – अध्यक्ष, टाटा सन्स
3. सुनील भारती मित्तल – अध्यक्ष, भारती एंटरप्रायझेस
4. श्रीनिवास (श्रीनी) पल्लिया – मुख्य कार्यकारी अधिकारी, विप्रो
5. सलिल एस. पारेख – मुख्य कार्यकारी अधिकारी, इन्फोसिस
6. संजीव बजाज – अध्यक्ष व व्यवस्थापकीय संचालक, बजाज फिनसर्व
7. हरी एस. भरतिया – संस्थापक व सह-अध्यक्ष, ज्यूबिलंट भरतिया समूह
जागतिक नेत्यांची मांदियाळी
यंदाच्या डावोस परिषदेसाठी १३० हून अधिक देशांमधील सुमारे ३,००० प्रतिनिधी उपस्थित आहेत. त्यामध्ये ६४ राष्ट्रप्रमुख व सरकारप्रमुखांचा समावेश आहे. उदयोन्मुख अर्थव्यवस्थांमधील नेत्यांची उपस्थिती विशेष लक्षवेधी ठरत आहे. दरम्यान, ट्रम्प यांच्या व्यापक धोरणात्मक निर्णयांमुळे WEF चा मूळ अजेंडा काहीसा झाकोळला गेला असल्याचे आयोजकांचे मत आहे. तरीही, जागतिक उद्योग आणि राजकारणाच्या भविष्यासाठी डावोस २०२६ ही परिषद अत्यंत महत्त्वाची मानली जात आहे.
