बेळगाव | जिल्ह्यातील करोनाबाधितांच्या संख्येत आणखी तीन रुग्णांची भर पडली आहे. रायबाग तालुक्यातील कुडची येथील तीन रुग्णांचे रिपोर्ट पॉझिटिव्ह आल्यामुळे जिल्ह्यातील करोनाग्रस्तांची संख्या सतरा झाली आहे. करोना रुग्णाच्या प्राथमिक संपर्कात आलेल्या एका वृद्धेचा मृत्यू झाल्यामुळे खळबळ उडाली आहे. बेळगाव जिल्हा करोनाच्या बाबतीत राज्यात तिसऱ्या क्रमांकावर आहे. त्यामुळे बेळगाव जिल्हा रेडझोनमध्ये आला आहे.
हिरेबागेवाडी येथील ऐशी वर्षाच्या वृद्धेचा मृत्यू झाला असून, ती वृद्धा करोना रुग्णाच्या संपर्कात आली होती. करोना रुग्णाच्या संपर्कात आलेल्या एकवीस व्यक्तींना इन्स्टिट्युशनल क्वारंटाइन करण्यात आले आहे. वृद्धेच्या घशातील स्वॅबचे नमुने तपासणीसाठी प्रयोगशाळेत पाठवण्यात आला आहे. अहवाल आल्यावर मृत्यूचे नक्की कारण समजणार आहे. त्या वृद्धेचा मृत्यू हार्ट अटॅकने झाला असावा असा प्राथमिक अंदाज तज्ज्ञांनी व्यक्त केल्याचे जिल्हाधिकाऱ्यांनी सांगितले.
